Këshilli i Evropës iu bashkua konferencës ndërkombëtare "Nga Konfiskimi tek e Mira Publike", të organizuar nga Agjencia e Administrimit të Pasurive të Sekuestruara dhe të Konfiskuara më 25-26 maj 2026 në Tiranë. Eventi mblodhi së bashku institucione shqiptare, partnerë ndërkombëtarë, prokurorë, zyrat e rikuperimit dhe menaxhimit të aseteve, si dhe ekspertë nga e gjithë Evropa për të diskutuar zhvillimet dhe sfidat më të fundit në fushën e rikuperimit dhe menaxhimit të aseteve.

Si pjesë e Panelit "Nga Hetimi tek Konfiskimi: Koordinimi ndërinstitucional dhe rikuperimi ndërkufitar i aseteve", eksperti i Këshillit të Evropës, z. Cornel Călinescu trajtoi zhvillimet kryesore në politikat ndërkombëtare që prekin sistemet e rikuperimit të aseteve, përfshi këtu Protokollin Shtesë të Konventës së Këshillit të Evropës për pastrimin, kërkimin, sekuestrimin dhe konfiskimin e të ardhurave nga veprat kriminale, dhe për financimin e terrorizmit.

Në fjalën e tij, z. Călinescu theksoi nevojën që Shqipëria të forcojë më tej koordinimin ndërinstitucional dhe kapacitetet operacionale në kuadër të zhvillimeve më të fundit të standardeve evropiane dhe ndërkombëtare. Ai theksoi rëndësinë e përforcimit të bashkëpunimit mes Zyrave të Rikuperimit të Aseteve, Zyrave të Menaxhimit të Aseteve, autoriteteve ligjzbatuese, prokurorëve dhe Agjencive/Njësive të Inteligjencës Financiare përgjatë gjithë procesit të rikuperimit të aseteve.

Diskutimet nxitën shkëmbimin e përvojave rajonale dhe praktikave të mira, duke avancuar sistemet e rikuperimit dhe menaxhimit të aseteve në përputhje me standardet evropiane dhe ndërkombëtare.

Kjo iniciativë është pjesë e projektit Forcimi i qëndrueshmërisë së sektorit publik ndaj korrupsionit, i bashkëfinancuar nga Këshilli i Evropës dhe Agjencia Zvicerane për Zhvillim dhe Bashkëpunim (SDC), dhe i implementuar nga Këshilli i Evropës.