Një delegacion i Komisionit Evropian për Efikasitetin e Drejtësisë (CEPEJ) vizitoi Shqipërinë në një mision për të përmirësuar efikasitetin e sistemit gjyqësor në Shqipëri përmes forcimit të mjeteve të mbledhjes dhe analizës së të dhënave.

Përfaqësuesit e CEPEJ zhvilluan një sërë takimesh të frytshme në Tiranë me përfaqësues të Ministrisë së Drejtësisë, Këshillave të Lartë të Gjyqtarëve dhe Prokurorëve, Prokurorisë së Përgjithshme, Inspektorit të Lartë të Drejtësisë dhe Dhomës Kombëtare të Ndërmjetësimit. Diskutimet u fokusuan në përmirësimin e mbledhjes së statistikave gjyqësore dhe rritjen e përdorimit të tyre në sistemin gjyqësor.

Delegacioni i CEPEJ vizitoi gjithashtu gjykatat e rretheve të Tiranës dhe Durrësit duke adresuar dhe diskutuar sfidat kryesore dhe masat konkrete për të përmirësuar efikasitetin gjyqësor brenda gjykatave dhe për të përmbushur më mirë nevojat e përdoruesve. Diskutime të rëndësishme u fokusuan në mënyrën se si të trajtohet më mirë numri i rasteve të pazgjidhura, si të zbatohen anketat e kënaqësisë dhe të modernizohen sistemet e Teknologjisë së Informacionit përmes zhvillimit të mjeteve digjitale, siç është platforma e njoftimeve elektronike për avokatët.

Një zhvillim i rëndësishëm në këtë kontekst është platforma dixhitale e njoftimeve elektronike për avokatët, e krijuar për të forcuar komunikimin ndërmjet gjykatave, avokatëve dhe përdoruesve nëpërmjet njoftimeve në kohë reale të thirrjeve dhe vendimeve gjyqësore. Kjo do të reduktojë vonesat procedurale dhe do të optimizojë pjesëmarrjen e të gjithë palëve të interesuara.

Misioni përfshiu gjithashtu shkëmbime dypalëshe me Zyrën e Delegacionit të Bashkimit Evropian në Shqipëri, si dhe me ekspertë nga projekti Eu4Justice, për të koordinuar projektet dhe për të identifikuar perspektiva të reja bashkëpunimi.

Ky aktivitet u bashkëorganizua nga projektet SEJIV “Forcimi i Cilësisë dhe Efikasitetit të Drejtësisë në Shqipëri”, dhe “Drejt një vlerësimi më të mirë të rezultateve të reformave gjyqësore në Ballkanin Perëndimor – Dashboard Western Balkans”, në kuadër të programit të përbashkët të Bashkimit Evropian dhe Këshillit të Evropës Instrumenti Horizontal për Ballkanin Perëndimor dhe Turqinë (III)