Projekti kundër krimit ekonomik në Shqipëri

Back Forcimi i reagimit rajonal ndaj krimit mjedisor, korrupsionit dhe pastrimit të parave në Ballkanin Perëndimor

Jutbina HOXHA

Modified 8 Months ago.

Forcimi i reagimit rajonal ndaj krimit mjedisor, korrupsionit dhe pastrimit të parave në Ballkanin Perëndimor

Krimi mjedisor paraqet një kërcënim në rritje për burimet natyrore, qeverisjen dhe stabilitetin në Ballkanin Perëndimor dhe më gjerë. Këto krime shpesh lulëzojnë me korrupsionin, duke gjeneruar fitime të paligjshme që pastrohen përmes skemave ndërkufitare ose rrjeteve të profesionistëve. Për të diskutuar një qasje të koordinuar në luftën kundër korrupsionit dhe krimeve mjedisore, u zhvillua në Strasburg një diskutim i hapur mbi identifikimin e sektorëve vulnerabël, kryerjen e vlerësimeve efektive të rrezikut dhe ngritjen e partneriteteve me shoqërinë civile dhe sektorin privat. Të gjitha këto janë thelbësore si për parandalimin e krimeve të tilla, ashtu edhe për zbatimin efektiv të kuadrit ligjor ekzistues.

Më shumë se 45 profesionistë nga Shqipëria, Bosnja dhe Hercegovina, Kosova*, Mali i Zi, Maqedonia e Veriut dhe Serbia, përfshirë agjencitë e zbatimit, prokurorë, doganierë dhe zyrtarë kufitarë, autoritete anti-korrupsion dhe mjedisore, si dhe përfaqësues të shoqërisë civile, morën pjesë në seminarin dy-ditor në Strasburg gjatë datave 23–24 shtator, ku u trajtuan lidhjet ndërmjet krimit mjedisor, korrupsionit dhe pastrimit të parave.

Gjatë aktivitetit u paraqitën gjetjet kryesore nga një studim rajonal mbi rreziqet e korrupsionit dhe pastrimit të parave të lidhura me krimin mjedisor si dhe u eksploruan mënyrat se si këto rreziqe mund të përfshihen në vlerësimet kombëtare ose sektoriale të rrezikut. Forcimi i hetimeve financiare, përmirësimi i bashkëpunimit ndër-institucional dhe angazhimi i një game më të gjerë aktorësh në luftën kundër flukseve financiare të paligjshme të lidhura me krimin mjedisor, ishin disa nga rekomandimet kryesore që u theksuan gjatë diskutimeve.

Ekspertë nga Këshilli i Evropës, prokurorë nga Italia, Kroacia dhe Rumania, si dhe njësi të mbrojtjes së mjedisit dhe zbatimit nga Franca (CESAN) dhe Spanja (SEPRONA), ndanë praktikat më të mira për hetimin dhe ndjekjen penale të këtyre veprave. Përfaqësues të EUROPOL-it u ndalën tek iniciativat e fundit, përfshirë krijimin e grupeve të reja të posaçme për krimin mjedisor, si dhe studime specifike që ilustrojnë cenueshmërinë e sektorit ndaj pastrimit të parave.

Ky aktivitet është pjesë e përpjekjeve të vazhdueshme të Këshillit të Evropës për të forcuar përgjigjet ndaj korrupsionit dhe pastrimit të parave, të lidhura me krimin mjedisor në Ballkanin Perëndimor. Në vijim, projekti i përbashkët i Bashkimit Evropian dhe Këshillit të Evropës kundër korrupsionit, do të mbështesë përfituesit në zhvillimin e udhëzuesve praktikë për parandalimin dhe luftën ndaj pastrimit të parave, e lidhur me krimin mjedisor.

Ky aktivitet u organizua nga Projekti kundër Krimit Ekonomik në Ballkanin Perëndimor, në kuadër të programit të përbashkët të Bashkimit Evropian dhe Këshillit të Evropës, “Instrumenti Horizontal për Ballkanin Perëndimor dhe Turqinë”. Ky projekt mbështet aktorët publikë në rajon, në përmirësimin e politikave dhe reagimeve operacionale kundër korrupsionit dhe pastrimit të parave, në përputhje me standardet dhe praktikat e mira evropiane.

Strasburg, Francë 23-24 shtator 2025

Diminuer la taille du texte
Augmenter la taille du texte
Imprimer la page

Shko lajmet nga Projekti kundër Krimit Ekonomik >>

“Projekti kundër krimit ekonomik në Shqipëri” (AEC-AL) zbatohet brenda programit të përbashkët të Bashkimit Evropian dhe Këshillit të Evropës “Instrumenti Horizontal për Ballkanin Perëndimor dhe Turqinë” që do të zbatohet nga janari 2023 deri në dhjetor 2026. Fushat prioritare të projektit janë:

harmonizimi i kuadrit ligjor dhe institucional në luftën kundër korrupsionit, në përputhje me rekomandimet e GRECO-s,
përmirësimi i efektivitetit të agjencive ligjzbatuese dhe sektorit të drejtësisë penale në luftën kundër krimit ekonomik,
forcimi i efektivitetit të mbikëqyrjes financiare të partive politike, përmirësimi i kapaciteteve legjislative dhe institucionale të autoriteteve përgjegjëse për gjurmimin dhe konfiskimin e aseteve kriminale,
përmirësimi i kapaciteteve institucionale dhe njerëzore për pajtueshmërinë dhe mbikëqyrjen e bazuar në rrezikun kundër pastrimit të parave, veçanërisht në lidhje me sektorin jofinanciar, sipas rekomandimeve të MONEYVAL-it.

Cili është qëllimi dhe objektivat e projektit?

Projekti synon të asistojë institucionet publike në parandalimin dhe luftën kundër krimit ekonomik, duke përfshirë korrupsionin, pastrimin e parave dhe krimin e organizuar. Projekti do të vazhdojë të mbështesë autoritetet në zbatimin efektiv të rekomandimeve të organeve monitoruese të Këshillit të Evropës, siç është Komiteti i Ekspertëve për Vlerësimin e Masave kundër Pastrimit të Parave dhe Financimin e Terrorizmit (MONEYVAL) dhe Grupi i Shteteve të Këshillit të Evropës kundër Korrupsionit (GRECO).

Kush përfiton nga projekti?

Projekti do të bashkëpunojë ngushtë me përfitues të ndryshëm dhe homologë në organet qeverisëse në të gjitha nivelet, agjencitë e specializuara dhe organet mbikëqyrëse, duke përfshirë:

Ministrinë e Drejtësisë në rolin e Koordinatorit Kombëtar kundër Korrupsionit, Ministrinë e Brendshme, Ministrinë e Financave,
Drejtorinë e Përgjithshme për Parandalimin e Pastrimit të Parave,
Inspektoratin e Lartë të Deklarimit dhe Kontrollit të Pasurive dhe Konfliktit të Interesave,
Prokurorinë e Përgjithshme, Prokurorinë dhe Gjykatën e Posaçme kundër Korrupsionit dhe Krimit të Organizuar,
Komisionin Qendror të Zgjedhjeve,
Drejtorinë e Përgjithshme të Policisë së Shtetit,
Shkollën e Magjistraturës, Akademinë e Sigurisë, Shkollën Shqiptare të Administratës Publike.

Projekti do të angazhojë organizata të shoqërisë civile të fushës, si dhe do të asistojë sektorin privat në përpjekjet në luftën kundër krimit ekonomik dhe pastrimit të parave, çka do të ndikojë pozitivisht në rritjen e besimin të publikut dhe do të përmirësojë jetën e qytetarëve shqiptarë.

Si do të funksionojë projekti?

Asistenca e ofruar përmes Projektit do të jepet nëpërmjet ndërhyrjeve këshilluese dhe forcimit të kapaciteteve, të përshtatura për nevojat specifike të përfituesve dhe duke u bazuar në rezultatet e arritura në zbatimin e Fazës I (2016-2019) dhe II (2019-2022) të Instrumentit Horizontal. Më konkretisht, projekti do të mbështesë autoritetet në disa drejtime, duke përfshirë:

forcimin e legjislacionit dhe kuadrit legjislativ;
ndërtimin e kapaciteteve institucionale;
rritjen e bashkëpunimit ndërinstitucional dhe ndërkombëtar.

Çfarë presim të arrijmë?

Projekti pritet të arrijë këto rezultate:

Përmirësimin e kuadrit ligjor dhe institucional për parandalimin e korrupsionit,
Përmirësimin e kapaciteteve njerëzore për parandalimin e pastrimit të parave dhe financimit të terrorizmit si dhe rritjen e efektivitet të agjencive ligjzbatuese dhe sektorit të drejtësisë penale në luftën kundër krimit ekonomik.

Sa do të kushtojë?

Buxheti total i projektit është 895,000 EUR. Buxheti i alokuar për programin e Instrumentit Horizontal arrin në 41 million EUR (85% financuar nga Bashkimi Evropian, 15% nga Këshilli i Evropës).

Si të marrësh më shumë informacion?

Nëpërmjet faqes së internetit të Divizionit për Bashkëpunimin kundër Krimit Ekonomik dhe të Projektit kundër Krimit Ekonomik;
Nëpërmjet faqes së internetit të Instrumentit Horizontal
Zahra Ahmadova, Menaxhere Programi, Divizioni për Bashkëpunimin kundër Krimit Ekonomik;
Ersida Sefa, Oficere e Lartë e Projektit, Divizioni për Bashkëpunimin kundër Krimit Ekonomik;
Marija Simić, Oficere Komunikimi për Instrumentin Horizontal;
Besnik Baka, Oficer Komunikimi për Instrumentin Horizontal;

Rreth Instrumentit Horizontal për Ballkanin Perëndimor dhe Turqinë

Instrumenti Horizontal për Ballkanin Perëndimor dhe Turqinë është një iniciativë e përbashkët e Bashkimit Evropian dhe Këshillit të Evropës që u mundëson përfituesve nga Ballkani Perëndimor dhe Turqia të përmbushin axhendat e tyre në fushën e të drejtave të njeriut, shtetit të së drejtës dhe demokracisë, në përputhje me standardet evropiane, si prioritet i procesit të zgjerimit të BE-së.