Katër shoqata shqiptare të qeverisjes vendore në bashkëpunim, dhe me mbështetjen e Kongresit të Autoriteteve Lokale dhe Rajonale të Këshillit të Europës, zhvilluan katër takime ”Tryeza e autoriteteve vendore për një ligj të ri mbi Organizimin dhe Funksionimin e Pushtetit Vendor”, nga 20 deri në 27 mars 2015 në qytetet Shkodër, Fier, Kamëz dhe Elbasan në kuadër të projektit “Fuqizimi i Strukturave të Pushtetit Vendor dhe Bashkëpunimit të Përfaqësuesve të Zgjedhur Vendorë në Shqipëri (2012-2015)”, zbatuar nga Këshilli i Europës dhe financuar nga Agjencia Zvicerane për Bashkëpunim dhe Zhvillim.
Takimi solli së bashku rreth 150 kryetarë dhe përfaqësues të tjerë të zgjedhur bashkish, komunash e qarqesh të të gjitha orientimeve politike dhe nga i gjithë vendi për të zhvilluar një proces dialogu mes tyre për një numër çështjesh shumë të rëndësishme për qeverisjen e vendore, si dhe për të kontribuar në proceset e pritshme ligjvënëse të reformës së decentralizimit.
Disa funksione e çështje të rëndësishme për qeverisjen vendore dhe qytetarët, të tilla si furnizimi me ujë të pijshëm e kanalizimi i ujrave të ndotura, grumbullimi, largimi dhe përpunimi i mbeturinave, planifikimi urban dhe kontrolli i territorit, arsimi para-universitar, organizimi i njësive të reja administrative, etj., ishin subjekt i një diskutimi të depolitizuar e konstruktiv mes tyre dhe për të cilat u arritën qëndrime të përbashkëta. Gjithashtu, gjatë takimeve u bënë shumë sugjerime dhe propozime për t’i dhënë zgjidhje problemeve përmes procesit të pritshëm ligjvënës, duke u bazuar në përvojën e zbatimit të legjislacionit aktual.
Takimet u karakterizuan nga një pjesëmarrje pluraliste dhe u organizuan me rotacion dhe ko-ordinim mes katër shqoatave të pushtetit vendor: Shoqata e Bashkive, Shoqata për Autonomi Vendore, Shoqata e Komunave dhe Shoqata e Këshillave të Qarqeve. Ato shënuan një precedent të rëndësishëm pozitiv të veprimit të përbashkët e të ko-ordinuar mes këtyre shoqatave pavarësisht dasive politike të instaluara prej vitesh mes tyre.
Një takim konkludues u organizua nga Kongresi i autoriteteve Vendore të Këshillit të Europës me një numër të kufizuar përfaqësuesish të të katër shoqatave të pushtetit vendor në Tiranë në 1 Prill 2015. Takimi konfirmoi pikëpamjet dhe propozimet e përbashkëta të të katër takimeve rajonale dhe përcaktoi hapat e mëtejshëm për t’i adresuar ato pranë autoriteteve qendrore.
Në vijim u përgatit raporti përfundimtar i takimeve “Informacion për pikëpamjet e autoriteteve vendore të Shqipërisë për nëj ligj të ri mbi Organizimin dhe Funksionimin e Pushtetit Vendor”, i cili iu komunikua qeverisë dhe parlamentit shqiptar, si dhe aktorëve të tjerë madhorë të interesit, në një përpjekje për të influencuar procesin e pritshëm të hartimit të kuadrit ligjor.