Përfaqësues të lartë të Gjykatave të Larta dhe organeve drejtuese gjyqësore të Ballkanit Perëndimor u mblodhën në Pogradec, Shqipëri, për të shkëmbyer praktikat më të mira për harmonizimin e praktikës gjyqësore vendase dhe për të kuptuar më tej mjetet e Gjykatës Evropiane të të Drejtave të Njeriut (GJEDNJ) për të mbështetur iniciativa të tilla.

Ky takim, i organizuar me mbështetjen e Bashkimit Evropian dhe Këshillit të Evropës, shërbeu si platformë për shkëmbimin e njohurive dhe mjeteve për të harmonizuar, zhvilluar dhe përmirësuar praktikat e brendshme, duke garantuar, njëkohësisht, sigurinë juridike, në përputhje me standardet evropiane.

Kjo nismë, bazohet në përpjekjet e vazhdueshme të Gjykatës së Lartë të Shqipërisë për zhvillimin e mjeteve harmonizuese si: instrumentet ligjore për të priorizuar çështjet gjyqësore, publikimin e përmbledhjeve të jurisprudencës për praktikuesit dhe organizimin e forumeve për diskutimin e vendimeve të saj kryesore me gjyqtarët e gjykatave të apelit dhe të rretheve, të cilët mbështesin këto iniciativa. Harmonizimi i praktikës gjyësore është thelbësor për të siguruar zbatimin efektiv të Konventës dhe parandalimin e ankesave të shumta që paraqiten në Gjykatën Evropiane të të Drejtave të Njeriut.

Ky aktivitet u organizua si pjesë e projektit “Rritja e mbrojtjes së të drejtës së pronës dhe lehtësimi i ekzekutimit të vendimeve të GJEDNJ në Shqipëri”, në kuadër të programit të përbashkët të Bashkimit Evropian dhe Këshillit të Evropës “Instrumenti Horizontal për Ballkanin Perëndimor dhe Turqinë”.