Në një hap të rëndësishëm drejt modernizimit të peizazhit mediatik në Shqipëri, Bashkimi Evropian dhe Këshilli i Evropës, në bashkëpunim të ngushtë me Autoritetin e Mediave Audiovizive të Shqipërisë (AMA), organizuan një tryezë të rrumbullakët dyditore në Tiranë. Përfaqësues nga AMA, zyrtarë qeveritarë dhe ekspertë nga Këshilli i Evropës u bënë bashkë për të eksploruar se si legjislacioni shqiptar mund të harmonizohet me normat e BE-së dhe standardet e Këshillit të Europës. Sesionet ofruan një analizë të thelluar mbi dispozitat kryesore të Aktit të Shërbimeve Digjitale (DSA) dhe Direktivës për Shërbimet e Medias Audiovizive (AVMSD), veçanërisht sa i përket platformave të shpërndarjes së videove, si dhe shqyrtuan strategji për koordinim efektiv institucional në fushën e rregullimit digjital.

Pjesëmarrësit përfituan nga njohuritë krahasuese dhe shembujt praktikë të ndarë nga Francesco Di Giorgi, Zyrtar i Lartë Ligjor në autoritetin rregullator italian AGCOM, me fokus në mbikëqyrjen, monitorimin dhe zbatimin sipas ligjit të BE-së mbi shërbimet digjitale.
Sesionet e udhëhequra nga eksperti mundësuan stafin e AMA-s dhe aktorët kryesorë të identifikonin boshllëqet ligjore, të diskutonin strategjitë e zbatimit dhe të hartonin rekomandime konkrete për forcimin e mbikëqyrjes dhe pajtueshmërisë rregullatore në mjedisin digjital.
Diskutimet dhe ushtrimet interaktive mundësuan pjesëmarrësit të zhvillonin strategji të zbatueshme për përmirësimin e mjedisit rregullator të Shqipërisë, duke kontribuar drejtpërdrejt në reformat në zbatim të sektorit të medias në vend.
Ky workshop u organizua nga Divizioni për Bashkëpunim për Lirinë e Shprehjes, si pjesë e veprimit të përbashkët të Bashkimit Evropian dhe Këshillit të Evropës “Mbrojtja e Lirisë së Shprehjes dhe e Medias në Shqipëri” (PROFREX-A)”, pjesë e programit të përbashkët “Instrumenti Horizontal për Ballkanin Perëndimor dhe Turqinë”.