Është muaji maj dhe, si çdo vit, bashkohemi për të festuar diversitetin dhe dinjitetin njerëzor në Shqipëri, duke ripohuar angazhimin tonë për të sfiduar diskriminimin dhe për të promovuar përfshirjen për të gjithë. Festivali i 17-të i Diversitetit, në kuadër të Ditës Ndërkombëtare Kundër Homofobisë, Transfobisë dhe Bifobisë, ka nisur tashmë. Organizata LGBTI, anëtarë të komunitetit dhe qytetarë mblidhen në një seri të gjallë aktivitetesh publike gjatë gjithë muajit, nën moton e këtij viti: “Bashkë për Familjen!”
Bashkimi Evropian dhe Këshilli i Evropës vazhdojnë të mbështesin me krenari organizatat LGBTI në Shqipëri, duke ndihmuar në luftën kundër diskriminimit, promovimin e përfshirjes dhe avancimin e mbrojtjes së të drejtave të njeriut për të gjithë.
Ndër momentet kryesore, Dialogu i Nivelit të Lartë mbi Anëtarësimin e Shqipërisë në BE dhe Perspektivën e të Drejtave LGBTI pasqyron njohjen gjithnjë e më të madhe se rruga drejt integrimit evropian është e pandashme nga mbrojtja e të drejtave themelore për të gjithë. Dy momente të rëndësishme do të pasojnë: ceremonia “Ngritja e Flamurit” pranë Ministrisë së Shëndetësisë dhe Mirëqenies Sociale në rrugën e Kavajës, simbol i dukshmërisë institucionale dhe solidaritetit, si dhe “Shkunde Homofobinë”, një aktivitet që ballafaqon paragjykimet përmes veprimit komunitar dhe përvojave të përbashkëta.
Festivali vazhdon më 17 maj me “Dumplings dhe Dashni”, duke ofruar një mbledhje intime në frymën e komunitetit dhe përkatësisë. Më 20 maj, do të mbahet Tryeza Strategjike Kombëtare për Mbrojtjen dhe Avancimin e të Drejtave LGBTI në Shqipëri, pranë Hotel Tirana International. Ky është një dialog politik thelbësor, që bashkon zërat institucionalë dhe të shoqërisë civile për të vlerësuar progresin dhe për të përcaktuar rrugën përpara. “The Temptation” Kiki Ball Party që do të organizohet në Qendrën Kulturore Agimi, është një tjetër mbrëmje festive gëzimi, arti dhe vetë-shprehjeje. Në fund të muajit, Konkursi i Poezisë Queer më 31 maj do t’u japë zë rrëfimeve personale, duke amplifikuar perspektiva që shpesh mbeten të padëgjuara.
Gjithashtu tre fushata online po zhvillohen paralelisht gjatë muajit maj, duke mbajtur të gjallë diskutimin përtej aktiviteteve fizike të festivalit. Me grafika kreative dhe vizuale, këto fushata do të rrisin ndërgjegjësimin për të drejtat e barabarta dhe diversitetin, duke arritur komunitete të ndryshme në mbarë Shqipërinë.
Këto aktivitete janë dëshmi e vendosmërisë dhe kreativitetit të komunitetit LGBTI në Shqipëri dhe aleatëve të tij. Së bashku, ata dërgojnë një mesazh të qartë: të drejtat e njeriut dhe barazia janë të panegociueshme, dhe një shoqëri vërtet përfshirëse ndërtohet duke qëndruar së bashku, duke ngritur zërin dhe duke mbështetur njëri-tjetrin, sot dhe çdo ditë.
Festivali i 17-të i Diversitetit u mbështet nga projekti “Fuqizimi i mbrojtjes nga diskriminimi në Shqipëri,” pjesë e programit të përbashkët të BE-së dhe Këshillit të Evropës “Instrumenti Horizontal III,” së bashku me Njësinë SOGIESC të Këshillit të Evropës.
Flickr
