Projekti Rritja e kapaciteteve të gjyqësorit për zbatimin më të mirë të standardeve të së drejtës për liri dhe siguri në Shqipëri iu bashkua një trajnimi dyditor mbi temën “Raportimi i Drejtësisë me Saktësi: Standardet Profesionale në Raportimin Ligjor dhe Gjyqësor”. Ky aktivitet, i organizuar për gazetarë dhe reporterë gjykatash, u zhvillua në kuadër të projektit të përbashkët të Bashkimit Evropian dhe Këshillit të Evropës Mbrojtja e Lirisë së Shprehjes dhe e Medias në Shqipëri (PROFREX), në bashkëpunim me Asociacionin e Gazetarëve të Shqipërisë.

Trajnimi përfshiu një sesion të dedikuar për paraburgimin, duke shqyrtuar zbatimin e tij, konceptet themelore dhe terminologjinë kyçe. Qëllimi ishte të ndihmonte gazetarët të kuptonin më mirë funksionin dhe përdorimin e masës së paraburgimit dhe t’i pajisë ata me mjetet për të raportuar mbi këtë temë në mënyrë të saktë dhe të përgjegjshme.

Duke përmirësuar kuptimin e gazetarëve për procedurat gjyqësore, kjo nismë synon të rrisë cilësinë e informimit publik në lidhje me paraburgimin në sistemin e drejtësisë. Ajo synon gjithashtu të forcojë besimin e publikut dhe të rrisë ndërgjegjësimin mbi rëndësinë e paraburgimit në mbrojtjen e të drejtave themelore të njeriut.

Sesioni u mirëprit nga gazetarët pjesëmarrës, të cilët ndanë përvojat dhe praktikat e tyre, duke theksuar rëndësinë e njohjes së thelluar të të drejtave procedurale që lidhen me paraburgimin.

Projekti do të vazhdojë të nxisë bashkëpunimin e ngushtë me median, me qëllim që konceptet që lidhen me paraburgimin të bëhen më të kuptueshme për gazetarët dhe, rrjedhimisht, për publikun e gjerë.

Projekti Rritja e kapaciteteve të gjyqësorit për zbatimin më të mirë të standardeve të së drejtës për liri dhe siguri në Shqipëri financohet nga Fondi i Mirëbesimit për të Drejtat e Njeriut (HRTF), i cili bashkon tetë shtete anëtare të Këshillit të Evropës: Finlandën, Gjermaninë, Irlandën, Luksemburgun, Holandën, Norvegjinë, Zvicrën dhe Mbretërinë e Bashkuar.