Gazetarë dhe reporterë të gjykatave u mblodhën në Tushemisht - Pogradec, për trajnimin dy-ditor me temë “Raportimi i Drejtësisë me Saktësi: Standardet Profesionale në Raportimin Ligjor dhe Gjyqësor”, i organizuar nga projekti i përbashkët i BE-së dhe Këshillit të Evropës Mbrojtja e Lirisë së Shprehjes dhe e Medias në Shqipëri (PROFREX), në bashkëpunim me Shoqatën e Gazetarëve Shqiptarë.

Aktiviteti forcoi  profesionalizmin dhe etikën e gazetarëve në mbulimin e çështjeve të drejtësisë dhe të gjykatave — thelbësore për transparencën, integritetin e medias dhe përparimin e Shqipërisë në rrugën e saj drejt anëtarësimit në BE.

Raportimi i saktë, i paanshëm dhe i përgjegjshëm i proceseve ligjore dhe gjyqësore luan një rol vendimtar në forcimin e besimit të publikut ndaj sistemit të drejtësisë. Trajnimi trajtoi nevojën gjithnjë në rritje që profesionistët e medias të kuptojnë kornizën ligjore të Shqipërisë, parimet e drejtësisë së hapur dhe standardet evropiane që mbrojnë lirinë e shprehjes (Neni 10 i KEDNJ-së) dhe të drejtën për një gjykim të drejtë (Neni 6 i KEDNJ-së).

Gjatë dy ditëve, pjesëmarrësit morën pjesë në prezantime të ekspertëve, ushtrime praktike dhe diskutime në grup mbi:

• drejtësinë e hapur dhe aksesin në informacionin gjyqësor;
• çështjet etike dhe kufijtë ligjorë në mbulimin mediatik të gjyqeve;
• rreziqet e përbuzjes së gjykatës dhe shpifjes;
• mbrojtjen e burimeve dhe të drejtave të privatësisë;
• ndërtimin e komunikimit konstruktiv ndërmjet medias dhe gjyqësorit.

Përmes simulimeve dhe studimeve të rasteve nga Gjykata Evropiane e të Drejtave të Njeriut, pjesëmarrësit zbatuan teorinë në praktikë dhe reflektuan mbi dilema të tilla si balancimi i interesit publik me të drejtat individuale.

Në përfundim, ata thelluan kuptimin e tyre mbi proceset gjyqësore dhe përmirësuan aftësinë për të raportuar me saktësi, etikë dhe përgjegjësi mbi çështje me interes publik, duke ndërtuar njëkohësisht rrjete më të forta profesionale midis gazetarëve dhe anëtarëve të gjyqësorit për të nxitur transparencën dhe besimin publik.

Ky trajnim u organizua nga Divizioni për Bashkëpunim në Fushën e Lirisë së Shprehjes dhe projekti Mbrojtja e Lirisë së Shprehjes dhe e Medias në Shqipëri, pjesë e programit të përbashkët të Bashkimit Evropian dhe Këshillit të Evropës Instrumenti Horizontal për Ballkanin Perëndimor dhe Turqinë.