Gjyqtarë, prokurorë, përfaqësues nga Institucionet e Pavarura të Drejtësisë, Zyra e Avokatit të Popullit, Ministria e Drejtësisë, Drejtoritë e Burgjeve dhe të Shërbimit të Provës, si dhe shoqëria civile u mblodhën për të diskutuar praktikat aktuale, qëndrimet kulturore dhe sfidat e lidhura me paraburgimin dhe zbatimin e masave alternative në Shqipëri.

Pjesëmarrësit pranuan sfidat e vazhdueshme në sistemin e paraburgimit, por ranë dakord se përmirësime domethënëse mund të arrihen brenda kuadrit institucional ekzistues. Presidenti i Gjykatës së Lartë bëri thirrje që gjykatat kombëtare të marrin vendime të individualizuara dhe të arsyetuara mirë, duke u larguar nga “formulimet stereotipike”, në përputhje me jurisprudencën e Gjykatës Evropiane për të Drejtat e Njeriut.

Ekspertët e Këshillit të Evropës ndanë praktika të mira nga vende të tjera dhe theksuan rolin thelbësor të kulturës gjyqësore në kufizimin e përdorimit të tepërt të paraburgimit. Ata nënvizuan rëndësinë e promovimit të alternativave efektive si monitorimi elektronik dhe masa e garancisë pasurore.

U theksua edhe roli i medias, ku pjesëmarrësit ranë dakord se raportimi mediatik ndikon ndjeshëm në perceptimin publik dhe besimin te gjyqësori. Ata u dakordësuan për nevojën e një angazhimi konstruktiv me median për të informuar më mirë publikun dhe për të ndërtuar besimin në sistemin e drejtësisë.

Pjesëmarrësit mirëpritën shkëmbimin e hapur mbi këtë temë të rëndësishme, duke theksuar rëndësinë e saj si për sistemin e drejtësisë në Shqipëri, ashtu edhe për shoqërinë në tërësi.

Ky aktivitet u organizua nga projekti i Këshillit të Evropës Rritja e kapaciteteve të gjyqësorit për zbatimin më të mirë të standardeve të së drejtës për liri dhe siguri në Shqipëri, i financuar nga Fondi i Mirëbesimit për të Drejtat e Njeriut (HRTF), i cili bashkon tetë shtete anëtare të Këshillit të Evropës: Finlandën, Gjermaninë, Irlandën, Luksemburgun, Holandën, Norvegjinë, Zvicrën dhe Mbretërinë e Bashkuar.