Gjyqtarë dhe prokurorë para-shërbimit, ekspertë ligjorë dhe përfaqësues të Shkollës së Magjistraturës u bënë bashkë për nisjen e kursit HELP të Këshillit të Evropës për Mbrojtjen e Gazetarëve. I organizuar në kuadër të projektit të përbashkët të Bashkimit Evropian dhe Këshillit të Evropës PRO-FREX, në bashkëpunim me Shkollën e Magjistraturës, ky kurs synon të forcojë kapacitetet e profesionistëve të drejtësisë për të mbrojtur në mënyrë efektive lirinë e shprehjes dhe të drejtat e gazetarëve në Shqipëri.

Një prezantim interaktiv i njohu pjesëmarrësit me Programin HELP, temat dhe përmbajtjen kryesore të tij. Pjesëmarrësit diskutuan gjithashtu sfidat aktuale për garantimin e sigurisë së gazetarëve, si në kontekstin vendas ashtu edhe në atë evropian.

Gjatë aktivitetit u prezantuan detaje praktike mbi regjistrimin, detyrat dhe vlerësimin, së bashku me përshtatjen e materialeve me kuadrin ligjor shqiptar. Pjesëmarrësit janë tashmë të regjistruar në platformën HELP të Këshillit të Evropës, duke shënuar kështu fillimin e një rrugëtimi bashkëpunues edukativ për të forcuar më tej sigurinë e gazetarëve në Shqipëri.

Ky aktivitet u organizua nga Divizioni për Bashkëpunim mbi Lirinë e Shprehjes, përmes projektit “Mbrojtja e Lirisë së Shprehjes dhe të Medias në Shqipëri”, pjesë e programit të përbashkët të Bashkimit Evropian dhe Këshillit të Evropës “Instrumenti Horizontal për Ballkanin Perëndimor dhe Turqinë”.