Одделението за соработка за слобода на изразување при Советот на Европа започнува со нова Програма за обука за пристап до информации во контекст на слободата на изразување. Оваа сеопфатна програма е наменета за три професионални целни групи: правни професионалци (вклучително судии, јавни обвинители и адвокати), државни службеници одговорни за управување со пристапот до информации, како и новинари и медиумски професионалци.
Курсот е модуларен и интерактивен, структуриран така што може да се прилагоди на националните контексти. Тој се темели на водечките европски стандарди, особено на членот 10 од Европската конвенција за човекови права и Конвенцијата на Советот на Европа за пристап до официјални документи (Тромсо конвенција), како и на релевантните национални правни рамки. Материјалите за обука се предвидени да се реализираат преку пристап со двајца обучувачи, обезбедувајќи истовремено меѓународна и домашна перспектива, преку комбинирање на експертиза во европската судска пракса и националното законодавство.
Содржините и практичните вежби се прилагодени на професионалната реалност на секоја целна група. Правните професионалци работат на напредна анализа на судска пракса и балансирање помеѓу пристапот до информации и правото на приватност. Државните службеници се фокусираат на добри административни практики, постапување по барања и проактивна транспарентност. Новинарите и медиумските актери се обучуваат за барање и користење официјални информации во рамки на одговорно новинарство и известување од јавен интерес.
Методологијата вклучува предавања, студии на случај, фасилитирани дискусии и практични вежби, со цел да се обезбеди активно учество и практична применливост за сите учесници. Програмата за обука поддржува и сесии за обука на обучувачи (Training-of-Trainers), овозможувајќи каскадни обуки за поширок опфат на корисници.
Материјалите за обука се јавни и можат да ги користат сите заинтересирани. Со цел да се обезбедат квалитет и доследност, од корисниците се бара единствено да го информираат Советот на Европа за начинот, времето и носителите на нивната употреба, да го наведат Советот на Европа како извор и да вклучат сертифицирани обучувачи, кои можат да бидат обучени преку програмите за обука на Советот на Европа.
Надлежните органи и институции во земјите членки на Советот на Европа се поканети да стапат во контакт со Одделението за соработка за слобода на изразување за поддршка при организирањето на сесиите за обука.
Овие материјали се подготвени во рамките на регионалната акција „Заштита на слободата на изразување и медиумите во Западен Балкан (PROFREX)“, спроведувана од Одделението за соработка за слобода на изразување при Советот на Европа. Акцијата PROFREX е дел од заедничката програма на Европската унија и Советот на Европа „Хоризонтален инструмент за Западен Балкан и Турција“.
+389 2 3100 323 