Советот на Европа ја нагласува клучната важност од унапредување на мултикултурализмот, антидискриминацијата и промовирањето на еднакви можности во рамки на училиштата како темел за градење инклузивни, демократски општества. Во поддршка на овие принципи, Агенцијата за остварување на правата на заедниците во Северна Македонија, во соработка со заедничкиот проект на Европската Унија и Советот на Европа за антидискриминација, организираше тркалезна маса за дискусија на итните потреби и развојните приоритети во напорите за унапредување на инклузивноста и еднаквоста во образованието.

Во изминатиот период, како дел од оваа активност, Агенцијата спроведе сеопфатно истражување преку прашалник насочен кон училиштата кои реализираат наставни програми на мајчин јазик на различни етнички заедници низ повеќе општини. Истражувањето имаше за цел да ги идентификува постојните состојби, предизвиците и добрите практики, како и да предложи конкретни мерки за понатамошно унапредување на образовниот процес. Посебен акцент беше ставен на зајакнување на меѓуетничката интеграција, антидискриминациските политики и обезбедувањето еднакви можности за секој ученик.

На настанот присуствуваа триесет и пет директори на основни училишта од 26 општини, кои ги претставуваа клучните институции одговорни за спроведување на наставата на јазиците на заедниците, како редовни или изборни предмети. Нивното учество беше препознаено како суштинско, имајќи го предвид нивното директно влијание врз образовниот процес на локално ниво.

Овој настан претставуваше значаен чекор напред во градењето инклузивно општество во кое секое дете има еднаков пристап до квалитетно образование, без оглед на јазикот или етничката припадност. Во текот на дискусиите беше истакнато дека отворениот дијалог, соработката и размената на искуства меѓу различните чинители се клучни за создавање поинклузивен образовен систем, како и за зајакнување на меѓуетничката кохезија и толеранцијата.

Оваа иницијатива беше поддржана од проектот „Борба против омразата и нетолеранцијата во Северна Македонија“, во рамките на заедничката програма на Европската Унија и Советот на Европа „Хоризонтален инструмент за Западен Балкан и Турција“.