Зајакнувањето на знаењето и вештините на државните службеници/чки во Северна Македонија, за поефикасна примена на законите поврзани со пристапот до информации, директно придонесува кон поголема транспарентност, отчетност и демократско управување. За поддршка на овој процес, во Скопје беше организирана специјализирана обука за државни службеници/чки на тема „Пристап до информации од јавен карактер: Европски стандарди и национална примена“, со поддршка на заедничкиот проект на ЕУ и Советот на Европа „Заштита на слободата на изразување и медиумите во Северна Македонија (ПРО-ФРЕКС)“.
На обуката учествуваа државни службеници/чки одговорни за обезбедување јавни информации од Владата, Канцеларијата на премиерот и министерствата. Тие го продлабочија своето разбирање за меѓународните и домашните рамки кои го уредуваат правото на пристап до јавни информации. Обучувач(к)ите ги водeа учесниците/чките низ клучните меѓународни стандарди, вклучувајќи ги Конвенциите од Тромсо и Архус, како и членот 10 од Европската конвенција за човекови права, и ги поврзаа со Законот за слободен пристап до информации од јавен караткер во Северна Македонија.
Обуката е дел од сеопфатната програма за обука на Советот на Европа за пристап до информации во контекст на слободата на изразување, развиен во рамките на заедничката регионална акција на ЕУ и Советот на Европа „Заштита на слободата на изразување и медиумите во Западен Балкан (ПРО-ФРЕКС)“ и е прилагодена на различни професионални групи, вклучувајќи суди(јк)и и обвинител(к)и, државни службеници/чки и новинар(к)и.
Интерактивната програма комбинираше предавања, студии на случаи, групни дискусии и практични вежби, помагајќи им на учесниците/чките да развијат практични вештини за ефективна примена на законите за пристап до информации во нивната секојдневна работа. Со зајакнување на знаењето и вештините на државните службеници/чки, обуката придонесува кон поголема транспарентност, отчетност и усогласеност со меѓународните стандарди, поддржувајќи го демократскиот развој и институционалниот интегритет во Северна Македонија.
Активноста се одржа многу блиску до „Меѓународниот ден за пристап до информации“, кој се одбележува секоја година на 28 септември, со симболично истакнување на важноста на транспарентноста како столб на слободата на изразување. Ратификацијата на Тромсо Конвенцијата од страна на Северна Македонија во ноември 2024 година дополнително ја потврдува заложбата на земјата за унапредување на правото на пристап до официјални документи во согласност со европските стандарди.
Оваа обука беше организирана во рамките на заедничката програма на Европската Унија и Советот на Европа „Horizontal Facility за Западен Балкан и Турција 2023-2026“ и проектот Заштита на слободата на изразување и на слободата на медиумите во Северна Македонија – ПРОФРЕКС имплементиран од Одделот за соработка на слобода на изразување
+ 389 (2) 3100 321
