На 9 јуни 2026 година во Скопје се одржа првиот состанок на Советодавниот одбор на проектот „Квалитетно образование за сите – Градење демократска отпорност во Северна Македонија“, со што официјално започна втората фаза од проектот.
Проектот, кој е имплементиран од Советот на Европа и финансиран од Сојузна Република Германија, има за цел да ги промовира демократијата и човековите права во и преку образованието преку поддршка на спроведувањето на Националната стратегија за образование 2026–2032 година, со посебен фокус на демократската култура, инклузивното образование и образованието за човекови права.
На состанокот учествуваа претставници на клучните национални институции одговорни за креирање и спроведување на образовните политики, членови на Советодавниот одбор на проектот, вклучувајќи ги Министерството за образование и наука, Бирото за развој на образованието, Државниот просветен инспекторат, Државниот испитен центар, Министерството за дигитална трансформација, Центарот за стручно образование и обука и Комисијата за спречување и заштита од дискриминација. На состанокот присуствуваа и претставници на Народниот правобранител, Генералниот секретаријат на Владата на Северна Македонија и Амбасадата на Сојузна Република Германија во својство на набљудувачи. Учесниците дискутираа за целите, очекуваните резултати и планираните активности во рамките на новата фаза од проектот, како и за постигнатите резултати и научените лекции од претходниот период на имплементација.
Надоврзувајќи се на резултатите постигнати во првата фаза, проектот ќе продолжи да ги поддржува националните власти, институциите и училиштата во зајакнувањето на демократското управување во училиштата, унапредувањето на инклузивните и партиципативни средини за учење и развојот на компетенциите за демократска култура кај учениците.
Посебно внимание ќе биде посветено на поддршката на спроведувањето на Националната стратегија за образование 2026–2032 година, зајакнувањето на соработката помеѓу релевантните чинители, промовирањето на демократски и инклузивни училишни практики и обезбедувањето одржливост на постигнатите резултати.
Новата фаза од проектот ќе вклучи и иновативни иницијативи насочени кон одговор на современите предизвици во образованието, меѓу кои активности поврзани со дигиталното демократско граѓанство и поддршка за развој на демократска култура и активно учество во средното стручно образование.
Учесниците ја истакнаа важноста од продолжување на меѓуинституционалната соработка и ја потврдија својата подготвеност за заедничка работа кон поинклузивен, попартиципативен и подемократски образовен систем кој ќе им овозможи на учениците да ги стекнат знаењата, вештините, вредностите и ставовите потребни за активно учество во мултикултурно и демократско општество.
Проектот ќе се спроведува во следните три години и ќе продолжи да ги поддржува реформите во образованието кои придонесуваат кон обезбедување квалитетно образование за сите ученици во Северна Македонија.
+ 389 (2) 3100 321
