Еднодневниот финален состанок на работната група насочен кон финализирање на изменетата Стандардна оперативна процедура (СОП) за постапување со лица на кои им е ограничено правото на слобода на движење се одржа на 10 јули 2017 г. во Скопје. Целта на состанокот беше да се дискутира по предлог измените на Стандардната оперативна процедура, кои беа изготвени и презентирани од страна на меѓународниот консултант и истите да се инкорпорираат во финалната верзија на документот. Измените ќе им обезбедат на полициските службеници подобрена Стандардна оперативна процедура во согласност со меѓународните стандарди за човекови права и добрите практики.
Состанокот беше насочуван од страна на меѓународен консултант на Советот на Европа. Работната група беше составена од вкупно 9 членови, службеници на Бирото за јавна безбедност при Министерството за внатрешни работи, полициски службеници од две полициски станици и претставници од Националниот превентивен механизам при канцеларијата на Народниот правобранител.
Состанокот на работната група беше организиран како дел од проектот „Јакнење на почитувањето на човековите права при полициското постапување”, кој е финансиран од страна на Европската унија и Советот на Европа во рамките на програмата „Horizontal Facility за Западен Балкан и Турција”.
Првата специфична цел е да се воведе ефикасна контрола над работата на полицијата преку воспоставување на надворешен механизам. 
