Еколошкиот криминал претставува сè поголема закана за природните ресурси, владеењето и стабилноста на Западен Балкан и пошироко. Овие кривични дела често се потпираат на корупција, создавајќи нелегални приходи кои се перат преку прекугранични шеми или професионални мрежи. За да се дискутира за координиран пристап во борбата против корупцијата и еколошкиот криминал, во Стразбур се одржа отворена расправа за идентификација на ранливите сектори, спроведување ефективни проценки на ризикот и градење партнерства со граѓанското општество и приватниот сектор. Сето ова е клучно за превенција на вакви кривични дела и за ефикасно спроведување на постојната правна рамка.
Повеќе од 45 професионалци од Албанија, Босна и Херцеговина, Косово*, Црна Гора, Северна Македонија и Србија, вклучително органи за спроведување на законот, обвинители, царински и гранични службеници, антикорупциски и еколошки органи, како и претставници на граѓанското општество, учествуваа на дводневната работилница во Стразбур на 23-24 септември, со цел да се адресира врската помеѓу еколошкиот криминал, корупцијата и перењето пари.
Работилницата ги претстави клучните наоди од регионалната анализа за ризиците од корупција и перење пари поврзани со еколошкиот криминал, а од друга страна се разгледуваше како овие ризици може да се интегрираат во национални или секторски проценки на ризик. Зајакнувањето на финансиските истраги, подобрувањето на меѓуинституционалната соработка и вклучувањето на поширок круг чинители во справувањето со нелегалните финансиски текови поврзани со еколошкиот криминал беа дел од клучните препораки истакнати за време на дискусиите.
Експерти од Советот на Европа, обвинители од Италија, Хрватска и Романија, како и единици за заштита на животната средина и спроведување на законот од Франција (CESAN) и Шпанија (SEPRONA), споделија добри практики за истрага и гонење на вакви кривични дела. Претставници на ЕУРОПОЛ, исто така, ги истакнаа неодамнешните иницијативи, вклучително создавањето на нови работни групи насочени кон еколошкиот криминал, како и студии на случај што ја илустрираат ранливоста на овој сектор кон перење пари.
Овој настан е дел од тековните напори на Советот на Европа за зајакнување на одговорите на корупцијата и перењето пари во врска со еколошкиот криминал на Западен Балкан. Понатаму, антикорупцискиот проект на ЕУ и Советот на Европа ќе им помогне на корисниците во развој на практични насоки за спречување и нарушување на перењето пари поврзано со еколошкиот криминал.
Работилницата беше организирана од проектот против економскиот криминал во Западен Балкан во рамките на заедничката програма на Европската Унија и Советот на Европа „Хоризонтален инструмент за Западен Балкан и Турција “. Проектот ги поддржува јавните институции во регионот во унапредувањето на нивните антикорупциски мерки против перење пари и оперативни одговори, во согласност со европските стандарди и добри практики.
**Оваа ознака не ги нарушува ставовите за статусот и е во согласност со Резолуцијата 1244 на Советот за безбедност на ОН и мислењето на МСП за Декларацијата за независност на Косово.
+389 2 3100 329 