Во периодот од 12 до 16 јули 2021 година, беше организирана онлајн Регионална летна школа за европските стандарди на слободата на изразување и слободата на медиумите, на која присуствуваа студент(к)и по право и политички науки и млади професионалци/ки од Западен Балкан.
Летната школа ја подигна свеста и го подобри знаењето за медиумскиот систем, улогите и одговорностите на различните чинители во ова поле. Истовремено, оваа програма придонесе кон подобро разбирање на европските стандарди, нивната важност за функционирањето на демократските општества и плуралистичкото медиумско опкружување, разбирање на информациите кои медиумските чинители, но и граѓаните/ките ги среќаваат и креираат.
Овој 5-дневен курс понуди знаење во делот на: слободата на изразување, најрелевантните и поврзани права и стандарди, како пристапот до информации од јавен карактер, правото на приватност, заштитата на податоци, медиумите и демократијата, говорот на омраза, медиумскиот плурализам, истражувачкото новинарство, безбедноста на новинар(к)ите, етичките стандарди, заштитата на укажувач(к)ите, родот и медиумите, заштитата на малолетниците/чките, интернетот и вештачката интелигенција.
Учесниците/чките од Aлбанија, Босна и Херцеговина, Црна Гора, Северна Македонија, Косово* и Србија учествуваа во дискусиите и презентациите на европските медиумски стандарди кои потекнуваат од Европската конвенција за човекови права, други бројни правни инструменти на ЕУ и Советот на Европа, вклучително и судската пракса на Европскиот суд за човекови права. Истовремено, се стекнаа и со практични вештини за користење на релевантни бази на податоци, како на пример Платформата за безбедност на новинар(к)ите и HUDOC.
Онлајн летната школа беше организирана во рамките на заедничката програма на Европската Унија и Советот на Европа „Horizontal Facility за Западен Балкан и Турција (2019-2022)“ и проектот „Слобода на изразување и слобода на медиумите во Југоисточна Европа (ЈУФРЕКС)“, кој има за цел да ги унапреди слободата на изразување и слободата на медиумите во Западен Балкан во согласност со соодветните европски стандарди.
*Ова назначување не е во спротивност со позициите за статусот и е во согласност со Резолуцијата 1244 на УНХЦР и мислењето на МСП за Косовската декларација за независност.
