Конференцијата за започнување на проектот „Квалитетно образование за сите – Градење демократска отпорност во Северна Македонија“ се одржа на 9 јуни 2026 година во Скопје, означувајќи го официјалниот почеток на втората фаза од проектот.

Проектот, имплементиран од Советот на Европа и финансиран од Сојузна Република Германија, има за цел да ги промовира демократијата и човековите права во и преку образованието преку поддршка на спроведувањето на Националната стратегија за образование 2026–2032 година, со посебен фокус на демократската култура, инклузивното образование и демократското училишно управување.

Конференцијата обедини претставници на национални институции, образовни професионалци, претставници на училишта, меѓународни партнери и други релевантни чинители за да се осврнат на постигнувањата од претходната фаза на проектот и да дискутираат за приоритетите во следните три години.

Во своите обраќања, претставници на Министерството за образование и наука, Сојузна Република Германија, Бирото за развој на образованието и Советот на Европа ја потврдија својата заложба за унапредување на демократското и инклузивното образование и ја истакнаа важноста од продолжување на соработката во спроведувањето на образовните реформи во Северна Македонија.

Во своето обраќање, заменик-министерот за образование и наука, Дритон Сулејмани, ја нагласи важната улога на образованието во поттикнувањето на демократските вредности и активното граѓанство кај младите.

„Квалитетното образование не значи само стекнување знаења и вештини, туку и оспособување на младите луѓе да станат активни, одговорни и ангажирани граѓани кои придонесуваат за градење инклузивни и демократски заедници“, истакна тој.

Претставувајќи го донаторот, амбасадорката Петра Дрекслер ја потврди континуираната поддршка на Германија за демократските и инклузивни образовни реформи и ја нагласи важноста од инвестирањето во младите и демократското учество.

„Програмата „Квалитетно образование за сите“ е осмислена да им обезбеди на младите луѓе алатки и можности да станат активни и информирани граѓани. Германија е длабоко посветена на поддршката на Советот на Европа во оваа важна област, бидејќи инвестирањето во демократијата и образованието претставува инвестиција во иднината на нашиот заеднички европски простор“, истакна таа.

На учесниците им беа претставени клучните резултати постигнати во првата фаза од проектот, вклучувајќи поддршка за развој на образовни политики, јакнење на капацитетите на наставниците и училишниот кадар, промовирање на демократско и инклузивно училишно управување и воспоставување на Мрежата на демократски и инклузивни училишта.

Надоврзувајќи се на овие достигнувања, новата фаза ќе биде насочена кон зајакнување на демократската отпорност низ целиот образовен систем. Преку поддршка на националните власти, институциите и училиштата, проектот ќе придонесува за демократско училишно управување, инклузивни и партиципативни средини за учење и развој на компетенции за демократска култура. Преку поттикнување на критичкото размислување, почитувањето на различностите, активното граѓанство и значајното учество, проектот има за цел да ги оспособи учениците и образовните професионалци да одговорат на современите предизвици, вклучувајќи дискриминација, исклученост, дезинформации и општествена поларизација.

Проектот ќе воведе и нови иницијативи насочени кон современите предизвици во образованието, вклучувајќи активности поврзани со дигиталното демократско граѓанство и демократското учество во дигиталната средина, како и поддршка за зајакнување на демократската култура и учеството во средното стручно образование.

Во рамките на конференцијата беа презентирани искуства и добри практики од Србија и Албанија, овозможувајќи размена на искуства и пристапи за зајакнување на демократското училишно управување, поддршката на наставниците и одржливите образовни реформи. Дискусиите ја истакнаа вредноста на регионалната соработка и меѓусебното учење во унапредувањето на демократското и инклузивното образование.

Новата фаза од проектот ќе се спроведува во следните три години и ќе продолжи да ги поддржува реформите кои придонесуваат кон квалитетно образование за сите ученици во Северна Македонија. Преку зајакнување на демократската отпорност на политичко, институционално и училишно ниво, проектот има за цел да ги оспособи учениците активно, одговорно и ефективно да учествуваат во демократските општества и да придонесуваат кон поинклузивни, покохезивни и поотпорни заедници.