Во просториите на Програмската канцеларија на Советот на Европа во Скопје, денес беше потпишан актот за прифаќање на Платформата за регистар на подароци помеѓу Олег Солдатов, раководител на Програмската канцеларија и Адем Чучуљ, претседател на Државната комисија за спречување на корупцијата.

Платформата е развиена како дел од Проектот на ЕУ/Советот на Европа против економскиот криминал во Северна Македонија и има за цел да ја поддржи Државната комисија за спречување на корупцијата (ДКСК) во дигитализацијата на процесите поврзани со регистрација и пријавување на подароци од страна на јавните службеници и вработените во државните институции. Со воведување на централизиран и безбеден дигитален систем, платформата ја подобрува ефикасноста, точноста и конзистентноста на пријавувањето поврзано со подароци.

„Советот на Европа со гордост ги поддржува напорите на Северна Македонија за промовирање на транспарентноста и доброто управување преку формалниот пренос на изворниот код на Каталогот на подароци до Државната комисија за спречување на корупција. Заедно со целна обука за државни службеници, оваа иницијатива дополнително ја зајакнува нашата заедничка посветеност на зајакнување на институционалниот интегритет и борба против корупцијата,” – Олег Солдатов, раководител на Програмската канцеларија на Советот на Европа во Скопје.

„На 30 јануари 2026 година, Државната комисија за спречување на корупцијата формално го прими изворниот код за Каталогот на подароци од Советот на Европа, со што ни се даде целосна сопственост врз оваа важна дигитална алатка за борба против корупцијата. Заедно со онлајн обуката за назначени државни службеници, одржана во декември 2025 година, овој трансфер значително ја зајакнува транспарентноста, институционалниот интегритет и јавната доверба во нашата работа. Државната комисија за спречување на корупцијата останува посветена на одржливи, дигитални решенија во тековната борба против корупцијата.“ – Адем Чучуљ, Претседател на Државната комисија за спречување на корупцијата.

Оваа иницијатива се спроведува преку „Проектот против економскиот криминал во Северна Македонија“, во рамките на заедничката програма на Европската Унија/Советот на Европа. “Horizontal Facility for the Western Balkans and Türkiye”.