Во периодот од 14 до 17 мај 2025 година, Советот на Европа успешно организираше две паралелни Летни школи во Струга, Северна Македонија, реализирани од страна на Македонскиот центар за граѓанско образование (МЦГО) како грантист, во рамките на проектот „Квалитетно образование за сите – Северна Македонија“, финансиран од Владата на Сојузна Република Германија.

Во изминатите три години, проектот поддржа 25 пилот-училишта во унапредување на инклузивното образование и развивање демократска училишна култура преку менторска поддршка, обуки и учество на заедницата. Летните академии беа кулминација на овие напори, собирајќи 25 наставници и 25 ученици за четиридневно интерактивно учење и размена на искуства.

Под мотото „Промовирање демократски вредности и педагошки иновации за инклузивни училници“, учесниците се вклучија во работилници на теми како што се недискриминација, различности, толеранција, мирно решавање конфликти и учество на учениците. Активностите беа родово одговорни и одржани на македонски и албански јазик.

Преку интерактивни сесии, студии на случај и планирање на идни активности, учесниците ги зајакнаа своите знаења и вештини во областа на демократска култура и активно граѓанство. Тие изработија акциски планови за унапредување на училишната средина и се обврзаа на примена на наученото.

Програмата беше изготвена врз основа на Референтната рамка за компетенции за демократска култура на Советот на Европа и надгради постојни национални материјали. Советот на Европа и неговите партнери веќе работат на финализирање и електронско објавување на едукативните материјали во соработка со Министерството за образование и наука и Бирото за развој на образованието.

Летните академии уште еднаш ја потврдија заложбата на проектот за создавање инклузивно, правично и демократско образование кое ги зајакнува и наставниците и учениците.