Заедничката поддршка на ЕУ и Советот на Европа во Северна Македонија дава особено значење на поддршката на јавните институции за јакнење на затворската реформа, како и на заштита на човековите права на осудените лица. Во овие рамки беше изготвена конечната нацрт верзија на Стратегијата за обука на затворскиот персонал, како и соодветната програма. Овие документи беа подготвени од искусни професионалци на Управата за извршување на санкциите (УИС), пробациски службеници, како и од неколку казнено-поправни установи. На состанокот имаше важна дискусија за практичните аспекти на спроведувањето на програмата, со цел јакнење на способностите на затворскиот персонал. Овие документи ја поставуваат основата за редовна и континуирана обука, како и за постојано градење на капацитети, со цел обезбедување структурирана обука за затворскиот персонал и зголемување на квалитетот на нивната работа.

Дополнително, 15 службеници на затворската и пробациската служба беа обучени за презентациски вештини, во текот на дводневната работилница на 28-29 септември во Скопје. Групата беше обучена за фазите на обуката, различните пристапи кон учењето на возрасните, пишување планови и структурирање на презентации, оценување на резултатите, како и практични совети како да се постапува и што да се избегнува. Оваа група на обучувачи се дел од клучниот тим на Центарот за тренинг и едукација на УИС, кои беа поддржани преку Хоризонталниот инструмент во изминатите две години.

Овие сесии беа организирани во рамките на заедничката програма на ЕУ и Советот на Европа  Хоризонтален инструмент за Западен Балкан и Турција – Фаза III, односно проектот „Јакнење на капацитетите на пенитенцијарниот систем во Северна Македонија”.