Нов прирачник за обука им е на располагање на полициските службеници во Северна Македонија. Тој ќе им помогне да ги препознаат можните случаи на трговија со луѓе (ТЛ), да постапуваат безбедно и во согласност со законите и да ги штитат правата на жртвите. Прирачникот е изработен со поддршка од заедничката акција на Европската Унија и Советот на Европа „Зајакнување на активностите против трговија со луѓе во Северна Македонија“, во соработка со Полициската академија при Министерството за внатрешни работи на Северна Македонија. Повеќеинституционалната работна група, составена од претставници на Националната комисија за борба против трговијата со луѓе, судството, обвинителството, центрите за социјална работа и граѓанските организации што работат директно со жртви на трговија со луѓе, го разгледа прирачникот за во него да бидат вклучени стручноста и перспективите на сите што се вклучени во спречувањето и справувањето со трговијата со луѓе.
„Во борбата против трговијата со луѓе, од клучно значење е полициските службеници да ги имаат знаењата и вештините потребни за да ги препознаат знаците на експлоатација, да соберат докази и професионално да ги заштитат човековите права на жртвите на трговија со луѓе. Овој прирачник е практична алатка за идните генерации во Полициската академија. Во него се наведени показатели за трговија со луѓе и се дадени насоки за интервјуирање на жртвите на начин што ја зема предвид траумата“, изјави Билјана ЛАЛОВА, главна инспекторка за основна обука и евалуација во Секторот за обука при Полициската академија.
Осврнувајќи се на прирачникот, ЛАЛОВА истакна дека различни заедници се изложени на ризик од трговија со луѓе. На пример, странските државјани можеби не го познаваат македонскиот јазик и можеби не се чувствуваат слободни да побараат помош. Луѓето може да бидат контролирани преку закани, насилство, измама, задолжување, одземање на личните документи или притисок врз нивните семејства. Во овој контекст, безбедноста и поддршката на жртвите се во средиштето на препорачаното постапување на полицијата во случаите на трговија со луѓе. Прирачникот ја нагласува и важноста на внимателното и навремено собирање докази, како и на координацијата со засегнатите чинители во борбата против трговијата со луѓе. Овој ресурсен материјал претставува уште една важна пресвртница во плодната соработка меѓу Советот на Европа и Полициската академија, насочена кон зајакнување на борбата против трговијата со луѓе, во согласност со европските стандарди.
Прирачникот е достапен на македонски јазик на: https://rm.coe.int/-web-pdf/48802db3c3
Акцијата „Зајакнување на активностите против трговија со луѓе во Северна Македонија “ е дел од заедничката иницијатива на Европската Унија и Советот на Европа „Хоризонтален инструмент за Западен Балкан и Турција“.
