Положбата и правата на жртвите на трговија со луѓе во судските постапки беа во фокусот на експертската дискусија на која учествуваа судии, јавни обвинители и членови на Националната комисија за борба против трговијата со луѓе (30 учесници) организирана во рамките на проектот "Спречување и сузбивање на трговијата со луѓе во Северна Македонија“.

Во текот на настанот резултатите и препораките од истражувањето за положбата и правата на жртвите на трговија со луѓе во судските постапки, врз основа на анализата на пресудите и стандардите на Советот на Европа беа презентирани и дискутирани со учесниците. Учесниците ја потврдија потребата за поголема заштита на жртвите во текот на судските постапки поради нивната психолошка ранливост. Навремена бесплатна правна помош, поддршка на децата жртви од страна на лица од доверба, мерки за заштита на жртвите, улогата на невладините организации што ги поддржуваат жртвите на трговија со луѓе и одредбата за неказнување беа меѓу дискутираните теми. Учесниците истакнаа дека државата треба да ги исполни своите обврски за обезбедување на бесплатна правна помош обезбедена преку буџетот и да овозможи пристап до надомест за жртвите на трговија со луѓе.

Даница Стошевска, претставничката на делегацијата на ЕУ ги информираше учесниците за главните аспекти на Стратегијата на ЕУ 2020-2025 за правата на жртвите. Таа нагласи дека заштитата на жртвите и децата е меѓу главните приоритети на ЕУ.

Експертската дискусија беше организирана во рамките на вториот курс за борба против трговијата со луѓе на платформата за образование за човекови права за правни професионалци (HELP) кој е организиран во соработка со Академијата за судии и јавни обвинители. Досега, 120 судии, кривични обвинители, адвокати и студенти на постдипломски студии по право го завршија курсот HELP за борба против трговија со луѓе во Северна Македонија.