Հայաստանում հավասարության, հանդուրժողականության, բազմազանության և բարգավաճման թեմաները ուսումնասիրվեցին TEDx ելույթի յուրահատուկ ձևաչափով, որը բանախոսներին հնարավորություն ընձեռեց բարձրաձայնել կարևոր հարցեր և լսելի դառնալ ներքին ու միջազգային լայն լսարաններին։ Միջոցառումը կազմակերպվել էր Եվրոպայի խորհրդի «Հավասարության խթանումը և խտրականության բացառումը Հայաստանում» ծրագրի և Հայաստանի Հանրապետության արդարադատության նախարարության կողմից։
Միջոցառման ընթացքում չորս բանախոսներ իրենց անձնական և մասնագիտական պատմությունների միջոցով ընդգծեցին հարգանքի և հավասարության կարևորությունը՝ խրախուսուսելով խոցելի խմբերին աջակցող գործողություններն ու դրական մոտեցումները։
Հայաստանի Հանրապետության արդարադատության նախարար Սրբուհի Գալյանը կիսվեց իր մասնագիտական ձեռքբերումների փորձով՝ հակադրությամբ հասարակության կանանց նկատմամբ ունեցած ակնկալիքների հետ։ Նա ընդգծեց, որ երբ կանայք հաջողության են հասնում, նրանց հաճախ դիտարկում են որպես բացառություն և ենթարկում ավելի խիստ քննադատության, քան տղամարդկանց։ Նախարարը հանդես եկավ այն դիրքորոշմամբ, որ բոլոր մասնագետները պետք է գնահատվեն բացառապես իրենց արժանիքներով և կարողություններով՝ անկախ սեռից։ Տիկին Գալյանը խրախուսեց այն գաղափարը, որ իրական և արդյունավետ համագործակցությունը, որտեղ և տղամարդիկ, և կանայք իրենց ներդրումն են բերում ըստ իրենց հմտությունների, հանգեցնում է ավելի լավ և ավելի ներառական հասարակության։ Նախարարը ընդգծեց, որ իրական առաջընթացը գալիս է այն ժամանակ, երբ կանանց հաջողությունը դառնում է նորմա և երբ կանայք իրենց ընտրությամբ դառնում են փոփոխության օրինակ։
Հայաստանում Եվրոպական միության պատվիրակության քաղաքական, մամուլի և տեղեկատվության բաժնի ղեկավարի տեղակալ Թոմաշ Օստրոպոլսկին ներկայացրեց Հայաստանի որպես իսկապես անվտանգ և բարգավաճ երկրի ընկալումը, ընդգծելով, որ այն կարող է շարունակել զարգանալ և բարգավաճել՝ լուծելով մարդու իրավունքների խնդիրներ, ինչպիսիք են ընտանեկան բռնությունը, սեռի հիմքով խտրականությունը և փոքրամասնությունների հանդեպ թշնամական վերաբերմունքը։ Պարոն Օստրոպոլսկին նշեց, որ իրական անվտանգությունն ու բարգավաճումը պահանջում են յուրաքանչյուր քաղաքացու ընդգրկումն ու պաշտպանությունը՝ անկախ նրանց ծագումից։ Նա նշեց, որ մարդու իրավունքների ընդունումը ոչ միայն բարոյական պարտավորություն է, այլև խելամիտ տնտեսական ռազմավարություն, որը խթանում է կայունությունը, ներդրումները և աճը։ Պարոն Օստրոպոլսկին ընդգծեց, որ մարդկու արժանապատվության պաշտպանությունը ներդրված է Հայաստանի պատմության և մշակութային ավանդույթների մեջ։
Հայաստանի Հանրապետության Ազգային Ժողովի մարդու իրավունքների պաշտպանության և հանրային հարցերի մշտական հանձնաժողովի նախագահի պաշտոնակատար Ռուստամ Բաքոյանը ներկայացրեց, թե ինչպես ցածր գրագիտությունն ու փոքրամասնությունների լեզուների աջակցության բացակայությունը կարող են հանգեցնել մշակույթի և ինքնության կորստի Հայաստանի էթնիկ համայնքներում։ Ինչպես նշեց պարոն Բաքոյանը, մշակույթի պահպանությունը պահանջում է իրական աջակցություն, հատկապես բնիկ լեզուներով կրթության միջոցով։ Այս առնչությամբ նա ընդգծեց, որ լեզուն մշակութային գոյատևման բանալին է, և առանց փոքրամասնությունների լեզուները դասավանդելու և պահպանելու համար անհրաժեշտ պատշաճ կրթական համակարգերի, ավանդույթներն ու ինքնությունները կարող են հեշտությամբ անհետանալ։ Պարոն Բաքոյանը նշեց, որ իրական մշակութային շարունակականությունը հնարավոր է ապահովել, եթե յուրաքանչյուր սերունդ կարողանա ապրել և փոխանցել իր մշակութային ժառանգությունը, ինչը իր հերթին հնարավոր է միայն մատչելի կրթության և ակտիվ ներգրավվածության միջոցով։
«Հավասար իրավունքներ, հավասար հնարավորություններ» hաշմանդամություն ունեցող անձանց իրավապաշտպան հասարակական կազմակերպությունը ներկայացնող Անուշ Ասլանյանը կիսվեց իր պատմությամբ՝ որպես ֆիզիկական հաշմանդամություն ունեցող գյուղաբնակ կին, անդրադառնալով անկախության և ինքնաընդունման կարևորությանը։ Տիկին Ասլանյանը նշեց, որ իրական անկախությունը հավասար չէ մեկուսացմանը, այլ ենթադրում է ինքնուրույն որոշումների կայացման և հասարակական ազդեցության միջև հավասարակշռված փոխգործակցության հասնելը։ Իր կյանքի պատկերավոր պատմությամբ տիկին Ասլանյանը ցույց տվեց, որ անկախություն հաստատելով՝ հաշմանդամություն ունեցող մարդիկ ոչ միայն կարող են ձեռք բերել ավելի մեծ ինքնավստահություն, այլև ոգեշնչել ուրիշներին ընդունել իրենց սեփական ինքնավարությունը։
TEDx ելույթը հիմնավորեց հավասարության սկզբունքի համընդհանուր կիրառելիությունը, ցույց տալով դրա անգնահատելի արժեքը հակախտրականության խթանման գործում՝ որպես բոլոր անհատների կարևոր իրավունք։
Սույն միջոցառումը Եվրոպական միության և Եվրոպայի խորհրդի «Գործընկերություն հանուն լավ կառավարման» համատեղ ծրագրի մի մասն է, որը համաֆինանսավորվում է Եվրոպական միության և Եվրոպայի խորհրդի կողմից և իրականացվում է Եվրոպայի խորհրդի կողմից՝ «Հավասարության խթանումը և խտրականության բացառումը Հայաստանում» ծրագրի շրջանակներում։
ՓԱՍՏԱԹՂԹԵՐ
ՀԱՅԱՍՏԱՆՅԱՆ ԾՐԱԳՐԵՐ
Կոնտակտներ