Բժշկական գաղտնիքը հանդիսանում է բժշկական էթիկայի հիմնարար սկզբունքներից մեկը և բժիշկ–պացիենտ հարաբերությունների առանցքային հիմնասյունը։ Քրեակատարողական հիմնարկներում, որտեղ անձինք գտնվում են առանձնահատուկ խոցելի իրավիճակում, անձնական առողջական տվյալների պաշտպանությունն առավել կարևոր նշանակություն ունի։
Այս երաշխիքները գործնականում ամրապնդելու նպատակով Հայաստանի քրեակատարողական հիմնարկների բուժանձնակազմն զարգացրել է իր կարողությունները բժշկական գաղտնիք համարվող տվյալների պատշաճ մշակման, գաղտնիության չափանիշների կիրառման, ինչպես նաև այլ հաստատությունների հետ արդյունավետ համագործակցության ոլորտներում։ Սույն նախաձեռնությունն իրականացվել է «Քրեակատարողական բժշկության կենտրոնի» աշխատակիցների համար կազմակերպված կարողությունների զարգացմանն ուղղված երկօրյա միջոցառման շրջանակում՝ մարտի 27–28-ին։
Երկօրյա դասընթացի ընթացքում մասնակիցներն ամրապնդել են իրենց գիտելիքներն անձնական տվյալների պաշտպանության, համաձայնության տրամադրման և գաղտնիության պահպանման խախտումներից բխող իրավական պատասխանատվության վերաբերյալ։ Վերապատրաստումը հիմնված էր համապարփակ զեկույցի և գործնական ուղեցույցի վրա, որոնք մշակվել են խթանելու քրեակատարողական բժշկական անձնակազմին իրենց ամենօրյա գործունեության ընթացքում իրավական և էթիկական չափանիշների կիրառումը։
Մասնակիցներն աշխատել են իրական կյանքի իրավիճակների և Մարդու իրավունքների եվրոպական դատարանի համապատասխան նախադեպային իրավունքի հիման վրա՝ ձեռք բերելով հստակ պատկերացում, թե ինչպես են բժշկական գաղտնիքի պահպանման վերաբերյալ խախտումները գնահատվում միջազգային մակարդակում։ Այս օրինակների վերլուծության միջոցով, մասնակիցները ձեռք են բերել առավել լայն պատկերացում՝ ՄԻԵԴ մոտեցումների, անձի իրավունքների և հանրային շահի միջև հավասարակշռման գաղափարի, ինչպես նաև՝ բժշկական գաղտնիք համարվող տվյալների ոչ պատշաճ պաշտպանության դեպքում առաջացող իրավական հետևանքների վերաբերյալ։
Միջոցառման ավարտին մասնակիցները հանձնառու եղան կիրառել ստացված գիտելիքներն իրենց մասնագիտական գործունեության ընթացքում՝ նպատակուղղված լինելով նպաստել առողջապահական ծառայությունների բարելավմանը և ազատությունից զրկված անձանց իրավունքների ավելի արդյունավետ պաշտպանությանը։
Այս միջոցառումն իրականացվել է Եվրոպայի խորհրդի «Ազատությունից զրկված անձանց իրավունքների պաշտպանության հետագա ամրապնդում» ծրագրի շրջանակում, որն աջակցում է ազգային իշխանություններին քրեակատարողական բարեփոխումների, քրեակատարողական հիմնարկների առողջապահության բարելավման և ազատությունից զրկված անձանց իրավունքների արդյունավետ պաշտպանության հարցում։ Ծրագիրը ֆինանսավորվում է Եվրոպայի խորհրդի 2023–2026 թթ. Հայաստանի գործողությունների պլանի շրջանակում և իրականացվում է Եվրոպայի խորհրդի կողմից։
Սկիզբ՝ 2025 թ․ հունվարի 1
ֆինանսավորում՝ 600,000 եվրո, 
Մոնիթորինգը Հայաստանում
