Հայաստան կատարած իր պաշտոնական այցի ընթացքում «Երևանյան երկխոսության» (Yerevan Dialogue) ավելի քան 500 մասնակիցների առջև ելույթ ունենալիս՝ Կոնգրեսի նախագահ Մարկ Քուլսը շեշտեց, որ «անորոշության դարաշրջանում կայունությունն ու անվտանգությունն ապահովելու լավագույն միջոցը ոչ թե ժողովրդավարական սկզբունքներից նահանջելն է, այլ դրանք էլ ավելի ամուր խարսխելն է տեղական, ազգային և միջազգային մակարդակներում»։
«Տեղական ինքնակառավարման ամրապնդումը ոչ միայն ներքին առաջնահերթություն է, այլև նաև կարևոր է ներքին և արտաքին ճնշումներին դիմակայելու ունակ ժողովրդավարություններ կառուցելու համար», - ընդգծեց նախագահ Քուլսը։
ՀՀ նախագահ Վահագն Խաչատուրյանի, Արտաքին գործերի նախարար Արարատ Միրզոյանի, Տարածքային կառավարման և ենթակառուցվածքների նախարար Դավիթ Խուդաթյանի և Երևանի քաղաքապետ Տիգրան Ավինյանի հետ հանդիպումների ժամանակ Կոնգրեսի նախագահը ողջունեց տեղական ինքնակառավարման բարեփոխումների շրջանակում տեղի ունեցած առաջընթացը և ընդգծեց Հայաստանի կարևորությունը՝ որպես տարածաշրջանում ժողովրդավարական կայունության հենասյուն։ Նա ընդգծեց տեղական մակարդակից դեպի վերև ժողովրդավարության վերականգնման ընդհանուր նպատակը, մասնավորապես տարածաշրջանային մարտահրավերների և անցումային ժամանակաշրջանի համատեքստում։ Հայաստանի իշխանությունները բարձր գնահատեցին Եվրոպայի խորհրդի կողմից Հայաստանի Հանրապետությանը ցուցաբերվող երկարատև աջակցությունը և հատուկ երախտագիտություն հայտնեցին փախստականների ճգնաժամը հաղթահարելու համար վերջերս պատրաստված արտակարգ իրավիճակներին արձագանքման փաթեթի համար։
«Երևանյան երկխոսությունը» գլոբալ ֆորում է, որը միավորում է միջազգային կազմակերպություններին, կառավարության ներկայացուցիչներին, քաղաքացիական հասարակության առաջնորդներին, մասնավոր հատվածին և փորձագետներին՝ գլոբալ աշխարհաքաղաքական մարտահրավերներին վերաբերող հրատապ հարցերը լուծելու համար։
Սկիզբ՝ 2022թ. դեկտեմբեր
Ֆինանսավորում՝ 1 100 000 Եվրո
Մոնիթորինգը Հայաստանում
