საქართველოს შინაგან საქმეთა სამინისტროს პოლიციის ტერიტორიული და სტრუქტურული დანაყოფების ხელმძღვანელმა პირებმა გაიარეს ტრენინგის კურსი, რომელიც მოიცავდა პოლიციის თანამშრომლების მიერ ადამიანის უფლებათა ევროპული კონვენციის მე-3 მუხლის გამოყენებასთან დაკავშირებულ საკითხებს. სხვა საკითხებთან ერთად, შეხვედრაზე განხილული იყო წამების და სხვა სასტიკი, არაადამიანური ან დამამცირებელი მოპყრობის განსაზღვრა და პრევენცია, სახელმწიფოს პოზიტიური ვალდებულებები, მე-3 მუხლის კავშირი კონვენციის სხვა მუხლებთან და სახელმწიფოს ვალდებულება დაიცვას ძალის გამოყენების და ეფექტიანი გამოძიების შესახებ არსებული საერთაშორისო სტანდარტები.
ღონისძიება გაიმართა ევროპის საბჭოს პროექტის - „არასრულწლოვან და ზრდასრულ თავისუფლებააღკვეთილ პირთა მხარდაჭერა” - ფარგლებში, რომლის მიზანია დაკავებულ პირთა უფლებების დაცვა, არასრულწლოვან მსხვერპლ/დამნაშავეთა მხარდაჭერა, არასათანადო მოპყრობასთან ბრძოლა, პოლიციის მიერ ჩადენილი არამართლზომიერი ქმედებებისა და სავარაუდო არასათანადო მოპყრობის გასაჩივრების მექანიზმების გაუმჯობესება.
