ՀՀ Արդարադատության նախարարության քրեակատարողական և պրոբացիայի ծառայությունների ներկայացուցիչներից բաղկացած պատվիրակությունը 2024 թվականի նոյեմբերի 13-ին և 14-ին ճանաչողական այցով Ստրասբուրգում այցելել է Եվրոպայի խորհուրդ։

Այցի նպատակն էր բարձրացնել Եվրոպայի խորհրդի առաքելության և արժեքների իրազեկվածությունն ու ըմբռնումը, ծանոթանալ մարդու իրավունքների, քրեակատարողական հիմնարկների կառավարման, պրոբացիայի ծառայությունների և վերականգնման ոլորտներում վերջին զարգացումներին և չափանիշներին՝ նպատակ ունենալով մոտեցնել Հայաստանի արդարադատության համակարգը եվրոպականին։

Այցի ընթացքում Եվրոպայի խորհրդի ներկայացուցիչները մասնակիցներին ներկայացրեցին կազմակերպության աշխատանքը քրեակատարողական և պրոբացիայի ոլորտներում, մտքեր փոխանակեցին մի շարք հարցերի շուրջ, ներառյալ՝ քրեակատարողական հիմնարկների կառավարման մեջ արհեստական բանականության էթիկական կիրառումը, կալանքի պայմանների բարելավման և պաշտպանության վերաբերյալ առաջարկությունները, մարդկային արժանապատվությունը ճաղերի հետևում։ Այս քննարկումները ընդգծեցին տեխնոլոգիական առաջընթացի ներուժը բարելավելու գործառնական արդյունավետությունը՝ միաժամանակ պաշտպանելով մարդու իրավունքները և ավելի սերտորեն համապատասխանեցնելով դրանք միջազգային չափանիշներին:

Այցի ծրագիրը համապարփակ ակնարկ էր ներկայացնում Եվրոպայի խորհրդի Խոշտանգումների կանխարգելման կոմիտեի, ինչպես նաև Մարդու իրավունքների եվրոպական դատարանի վճիռների կատարման վարչության և դատարանի համապատասխան նախադեպային իրավունքի աշխատանքի մասին, ներառյալ՝ Հայաստանի հետ կապված վերջին զարգացումները։ Հետագա քննարկումները նաև անդրադարձան ազատազրկված անձանց և ազատազրկվածների շրջանում թմրամիջոցների չարաշահմանն ու կախվածությանը, վերականգնողական ծրագրերի բարելավման և ազատազրկված անձանց շրջանում վերաինտեգրմանն աջակցելու լուծումներ առաջարկելուն:

Այցը նպաստեց Եվրոպայի խորհրդի տարբեր բաժինների հետ համագործակցության խորացմանը և հնարավորություն ընձեռեց հետագա աջակցության համար: Ակնկալվում է, որ դրա արդյունքում կառաջարկվեն իմաստալից բարեփոխումներ Հայաստանում՝ կենտրոնանալով ազատազրկված անձնաց վերականգնման բարելավման, արդիականացված վերականգնողական ծրագրերի և կրկնահանցագործության նվազեցման համապարփակ ռազմավարությունների վրա:

Միջոցառումը կազմակերպվել է Եվրոպայի խորհրդի կողմից իրականացվող «Ազատությունից զրկված անձանց իրավունքների պաշտպանության ամրապնդումը» և «Աջակցություն Հայաստանում Պրոբացիայի ծառայության հզորացմանը» ծրագրերի շրջանակներում: Ծրագրերըը ֆինանսավորվում է Եվրոպայի խորհրդի 2023-2026 թվականների՝ Հայաստանի համար գործողությունների ծրագրի շրջանակներում և իրականացվում է Եվրոպայի խորհրդի կողմից: