Եվրոպայի խորհրդի մարդու իրավունքների հանձնակատար Մայքլ Օ'Ֆլահերտին նամակով դիմել է Հայաստանի վարչապետին՝ առաջարկելով հակախտրական համապարփակ օրենք ընդունել։
Հանձնակատարը ողջունել է Հայաստանի առաջընթացն այս ոլորտում, մասնավորապես՝ ոլորտային օրենսդրության ներդրումը և Քրեական օրենսգրքում ամրագրված նոր երաշխիքները, ինչպես նաև Մարդու իրավունքների պաշտպանի ակտիվ ներգրավվածությունը։ ՀՀ արդարադատության նախարարությունն այժմ մշակում է խտրականության կանխարգելման և դրա դեմ պայքարի մասին օրինագիծը։ Հանձնակատարը կոչ է արել Հայաստանի վարչապետին օգտվել հնարավորությունից և ընդունել համապարփակ օրենսդրություն, որը կհամապատասխանի միջազգային չափանիշներին և բազմազան հասարակության կարիքներին։ Այս ամենը պետք է իրականացվի քաղաքացիական հասարակության և միջազգային կազմակերպությունների, ներառյալ Եվրոպայի խորհրդի, հետ սերտ խորհրդատվությունների արդյունքում։
Միևնույն ժամանակ, Օ'Ֆլահերտին մատնանշել է մի շարք էական բացթողումներ։ Ըստ հանձնակատարի՝ Մարդու իրավունքների պաշտպանը պետք է օժտվի հստակ սահմանված լիազորություններով, որպես հավասարության մարմին՝ խտրականության դեմ արդյունավետ պայքարի և հավասարությունը խթանելու համար անհրաժեշտ իրավասություններով, լիազորություններով և ռեսուրսներով։ Առանձնահատուկ շեշտադրմամբ Օ'Ֆլահերտին կոչ է արել օրենքով պաշտպանվող հիմքերի ցանկում ուղղակիորեն ներառել սեռական կողմնորոշումը, գենդերային ինքնությունը և ԼԳԲՏՔ+ անձանց իրավունքների պաշտպանության հարցում իրավական որոշակիություն ապահովելու համար նախատեսված սեռական հատկանիշները։
Կոնտակտներ