Back Կլոր սեղանը Երևանում ընդգծում է Հայաստանի առաջընթացը Եվրոպական սոցիալական խարտիայի 11-րդ հոդվածի վավերացման ուղղությամբ

Կլոր սեղանը Երևանում ընդգծում է Հայաստանի առաջընթացը Եվրոպական սոցիալական խարտիայի 11-րդ հոդվածի վավերացման ուղղությամբ

Եվրոպայի խորհուրդը Երևանում անցկացրեց բարձր մակարդակի կլոր սեղան քննարկում՝ նպատակ ունենալով առաջ մղել Եվրոպական սոցիալական խարտիայի 11-րդ հոդվածի վավերացումը, որը սահմանում է առողջության պաշտպանության իրավունքը։

Միջոցառմանը մասնակցեցին Հայաստանի կառավարության, Ազգային ժողովի, Մարդու իրավունքների պաշտպանի գրասենյակի ներկայացուցիչներ, Առողջապահության համաշխարհայի կազմակերպության, ինչպես նաև միջազգային փորձագետներ՝ ներառյալ Եվրոպական սոցիալական իրավունքների կոմիտեի և Եվրոպայի խորհրդի քարտուղարության անդամներ։

Մասնակիցները քննարկեցին բոլորի համար որակյալ առողջապահական ծառայությունների հասանելիության ապահովման, առողջապահական անհավասարությունների հաղթահարման և ամենախոցելի խմբերի պաշտպանության համար ինստիտուցիոնալ կարողությունների ամրապնդման կարևորությունը։ Առողջապահության, աշխատանքի և սոցիալական հարցերի, ֆինանսների և արտաքին գործերի նախարարությունների, ինչպես նաև Ազգային ժողովի առողջապահության, աշխատանքի և սոցիալական հարցերի ու մարդու իրավունքների մշտական հանձնաժողովների ներկայացուցիչները փոխանակեցին տեսակետներ՝ վավերացման իրավական, ֆինանսական և քաղաքական հետևանքների վերաբերյալ։

Միջազգային փորձագետներն ընդգծեցին, որ Եվրոպական սոցիալական խարտիայով երաշխավորված առողջության իրավունքը լրացնում է Մարդու իրավունքների եվրոպական կոնվենցիայով նախատեսված պաշտպանությունը՝ պետություններին պարտավորեցնելով իրականացնել դրական քայլեր՝ առողջությունը խթանելու և հիվանդությունները կանխելու նպատակով։ Քննարկման ընթացքում անդրադարձ կատարվեց նաև Եվրոպայի խորհրդի այլ անդամ պետությունների համեմատական փորձին՝ ցույց տալով, թե ինչպես կարող է վավերացումը նպաստել հաշվետվողականության բարձրացմանը, հանրային առողջապահության կառավարման բարելավմանը և առողջապահական ծառայությունների հասանելիության հավասարեցմանը։

Կլոր սեղանը վերահաստատեց Եվրոպայի խորհրդի շարունակական աջակցությունը Հայաստանին՝ սոցիալական իրավունքների առաջխաղացման և երկրի՝ եվրոպական չափանիշներին համապատասխանեցման խթանման գործում։ Քննարկումը եզրափակվեց բոլոր շահագրգիռ կողմերի համատեղ հանձնառությամբ՝ խորացնելու համագործակցությունը և շարունակելու աշխատանքը 11-րդ հոդվածի վավերացման ուղղությամբ։

Միջոցառումը իրականացվել է Եվրոպայի խորհրդի «Հայաստանում մարդու սոցիալական իրավունքների ամրապնդում» ծրագրի շրջանակում, որը Հայաստանի համար Եվրոպայի խորհրդի Գործողությունների ծրագրի (2023–2026 թթ.) մաս է կազմում։

ԵՐԵՎԱՆ, ՀԱՅԱՍՏԱՆ 13 ՆՈՅԵՄԲԵՐԻ, 2025թ․
  • Diminuer la taille du texte
  • Augmenter la taille du texte
  • Imprimer la page

Մարդու սոցիալական իրավունքների ամրապնդումը Հայաստանում ծրագիրը հանդիսանում է Եվրոպայի խորհրդի կողմից Հայաստանում փախստականների ներհոսքին արձագանքելու նպատակով մեկնարկած համապարփակ արձագանքման փաթեթի մաս: Ծրագիրը կոչված է աջակցելու Հայաստանի իշխանություններին սոցիալական և տնտեսական իրավունքների հրատապ մարտահրավերներին դիմակայելու հարցում: Որպես Հայաստանի համար Եվրոպայի խորհրդի 2023-2026 թվականների գործողությունների ծրագրի բաղկացուցիչ մաս, այն ուղղված է Հայաստանում սոցիալական իրավունքների պաշտպանության բարձրացմանը՝ միջազգային չափանիշներին համապատասխան՝ ճգնաժամային իրավիճակներին արձագանքելու համար:

 

 Սկիզբ՝ 01 հունվարի 2024թ․

 Տևողություն՝ 36 ամիս

 Ֆինանսավորում՝ 950 000 եվրո, Եվրոպայի Խորհուրդ Հայաստանի համար իրականացվող գործողությունների 2023-2026թթ․ ծրագիր

Կոնտակտային անձ՝ Մարիամ Ալեքսանյան, ծրագրի ավագ պատասխանատու

Ովքե՞ր են ծրագրի շահառուները
Ինչպե՞ս է իրականացվում ծրագիրը

Համագործակցության ծրագիրն իրականացվում է Եվրոպայի Խորհրդի կողմից Հայաստանի համար Եվրոպայի խորհրդի 2023-2026 թվականների գործողությունների ծրագրով սահմանված առաջնահերթություններին համահունչ: 

Ի՞նչ արդյունքի ենք ակնկալում հասնել

Ծրագիրն ընդգծում է ժողովրդավարության ամրապնդման գործում սոցիալական իրավունքների հիմնարար դերը և միտված է հասնել հետևյալ արդյունքների։

  • Ապահովել փորձագիտական աջակցություն՝ բնակարանային ապահովման, զբաղվածության, մասնագիտական ուսուցման և աշխատանքային իրավունքների վերաբերյալ ազգային օրենսդրությունը եվրոպական չափանիշներին համապատասխանեցնելու հարցում՝ որդեգրելով համապարփակ, գենդերազգայուն մոտեցում:
  • Հզորացնել ազգային իշխանությունների կարողությունները՝ քաղաքականությունն ու գործելակերպը եվրոպական չափանիշներին ներդաշնակեցնելու համար՝ ապահովելով սոցիալական իրավունքների հուսալի պաշտպանությունը և իրականացումը։
  • Ամրապնդել որոշումներ կայացնողների իրազեկվածությունը Եվրոպական սոցիալական խարտիայի և Կոլեկտիվ բողոքների ընթացակարգի նոր դրույթների ընդունման վերաբերյալ։
  • Մարդու իրավունքների պաշտպանի աշխատակազմի, հասարակական կազմակերպությունների և իրավաբան մասնագետների կարողությունների զարգացման ապահովում՝ արդյունավետ իրականացնելու և մշտադիտարկելու սոցիալական իրավունքների պահպանումը՝ հիմնվելով Եվրոպական սոցիալական խարտիայի և Սոցիալական իրավունքների Եվրոպական կոմիտեի դատական պրակտիկայի վրա։
  • Բարձրացնել տեղահանված անձանց և խոցելի խմբերի ներկայացուցիչների իրազեկվածությունը իրենց իրավունքների և արտոնությունների վերաբերյալ՝ կարևորելով նրանց սոցիալական իրավունքները և սոցիալական ծառայությունների մատչելիությունը: Միաժամանակ, այն նպատակ ունի բարձրացնել պետական և տեղական իշխանությունների կողմից իրենց դերի և պարտականությունների ըմբռնումը, ինչպես նաև բարելավել սոցիալական ծառայությունների մատուցումը ազգային և տեղական մակարդակներում:
Փաստաթղթեր