დემოკრატიული კულტურის განვითარება სკოლის სივრციდან იწყება. მოსწავლეების სასკოლო ცხოვრებაში მონაწილეობა, გადაწყვეტილებების მიღებაში ჩართულობის გამოცდილება, გამოხატვის თავისუფლება და დისკუსია აქტიური მოქალაქის ჩამოყალიბების ხელშემწყობი პროცესებია.
„დემოკრატიული სკოლის განვითარება“ ევროპის საბჭოს პროფესიული განვითარების პროგრამაა, რომელიც საჯარო სკოლების დირექტორებს და მოადგილეებს სკოლის დემოკრატიული პრინციპებით მართვის დანერგვაში ეხმარება. 6 მაისს დაწყებული პროგრამა 18 ივნისამდე გაგრძელდება და მასში მონაწილეობს 60-მდე დირექტორი და მოადგილე საქართველოს 28 სკოლიდან.
პროგრამის სესიების უმეტესი ნაწილი პრაქტიკულ ვარჯიშს, საუკეთესო პრაქტიკების გაზიარებასა და სკოლების დემოკრატიული მართვის გასაძლიერებელად სასარგებლო სტრატეგიებისა და ინსტრუმენტების შემუშავებას ეთმობა. კურსი მოიცავს სამ ორდღიან სამუშო შეხვედრას სამკვირიანი ინტერვალებით შეხვედრებს შორის, რომელთა დროსაც სკოლების წარმომადგენლები შეიმუშავებენ გეგმებს და მიღებულ ცოდნას პრაქტიკაში გამოიყენებენ.
პროგრამა დირექტორებს და მოადგილეებს დაეხმარება, უკეთ გაიაზრონ სკოლების დემოკრატიული მართვის სარგებელი და მისი გავლენა დემოკრატიული კულტურის განვითარებაზე. პროგრამის დასრულების შემდეგ მონაწილეებს ექნებათ ხედვა, თუ რა სტრატეგიით არის შესაძლებელი მოსწავლეებისა და სასკოლო საზოგადოების სხვა წევრების მონაწილეობის გაზრდა სასკოლო ცხოვრებაში, როგორ შეიძლება განვითარდეს სკოლებისა და თემის ურთიერთობა.
*პროექტი „დემოკრატია იწყება სკოლაში-მოსწავლეთა ჩართვა გადაწყვეტილების მიღების პროცესებში სკოლასა და ადგილობრივ თემში“ ხორციელდება ევროპის საბჭოს მიერ, განათლებისა და მეცნიერების სამინისტროსთან თანამშრომლობითა და შვეიცარიის განვითარებისა და თანამშრომლობის სააგენტოს (SDC) ფინანსური მხარდაჭერით.
