2026 წლის სექტემბრიდან, ნინოწმინდის, ქედას, ამბროლაურის, მესტიისა და ზუგდიდის საჯარო სკოლის მოსწავლეები, მასწავლებლები და მშობლები სასკოლო მონაწილეობითი ბიუჯეტირების მეშვეობით შეეცდებიან ამ კითხვებზე პასუხის გაცემას.
აღნიშნული პროცესი სასკოლო საზოგადოებებს მისცემს პრაქტიკულ მიმართულებას, გამოავლინონ თავიანთი საჭიროებები და გარდაქმნან ისინი კონკრეტულ ინიციატივებად.
„სასკოლო მონაწილეობითი ბიუჯეტირება უნიკალურია, რადგან ის პროცესში აქტიურად რთავს მთელ სასკოლო საზოგადოებას - მასწავლებლებს, მოსწავლეებს და მშობლებს“, - თქვა ერთ-ერთმა მონაწილემ ამბროლაურის საჯარო სკოლიდან - „მთელი სასკოლო საზოგადოება ერთად მუშაობს“.
პროცესის დასაწყებად, განათლების სამინისტროს სამოქალაქო განათლების ექსპერტები და ხუთი სკოლის წარმომადგენელი - ჯამში 33 მონაწილე ჩაერთო სამდღიან ტრენერთა ტრენინგში, რომელიც 2026 წლის 21-23 ივლისს გაიმართა. მათ, ასევე, მოისმინეს თბილისის 177-ე და ზესტაფონის მე-4 საჯარო სკოლების გამოცდილება, რომლებმაც წინა სასწავლო წელს მოახდინეს სასკოლო მონაწილეობის ბიუჯეტირების პილოტირება.
პრაქტიკული სავარჯიშოებისა და სიმულაციის მეშვეობით, მონაწილეებმა ისწავლეს სკოლის საჭიროებების იდენტიფიცირებისა და სკოლის მასშტაბით, გამჭვირვალე ხმის მიცემის დამოუკიდებლად წარმართვის პროცესი.
შედეგად, ხუთივე სკოლას ჰყავს გადამზადებული წარმომადგენელი, რომელიც მოსწავლეებს, მასწავლებლებსა და მშობლებს დაეხმარება მეტად ჩაერთონ იმ გადაწყვეტილებების მიღებაში, რომლებიც პირდაპირ გავლენას ახდენს მათ ყოველდღიურ სასკოლო ცხოვრებაზე. სექტემბრიდან, სასკოლო საზოგადოებები შეძლებენ, შეიმუშაონ და გაავრცელონ თავიანთი იდეები, განიხილონ ინიციატივები და ერთად გადაწყვიტონ სამომავლო პროექტების განხორციელება.
მოსწავლეებისთვის ეს ნიშნავს იმის გააზრებას, რომ მონაწილეობა არა აბსტრაქტული ცნება, არამედ - რეალური შესაძლებლობაა, რომ გავლენა მოახდინონ გარემოზე, სადაც დროის მნიშვნელოვან ნაწილს ატარებენ.
აღნიშნული ღონისძიება ორგანიზებული იყო პროექტის „მონაწილეობითი და ადამიანის უფლებებზე დაფუძნებული ადგილობრივი დემოკრატიის ხელშეწყობა საქართველოში“ ფარგლებში, რომელსაც ახორციელებს ადგილობრივ და რეგიონულ ხელისუფალთა კონგრესთან არსებული მრავალდონიანი მმართველობის ექსპერტიზის ცენტრი, საქართველოსთვის ევროპის საბჭოს 2024-2027 წლების სამოქმედო გეგმის ფარგლებში, ავსტრიის საერთაშორისო პარტნიორობის ფინანსური მხარდაჭერით.
+99532 2913870/ 71/ 72