Այն անհատները, ովքեր հարցեր կամ մտահոգություններ ունեն՝ կապված Հայաստանի քաղաքացիության, փաստաթղթերի ընթացակարգերի կամ օտարերկրյա քաղաքացիներին մատուցվող ծառայությունների հետ, այժմ ունեն հուսալի և պատասխանատու շփման կետ: Հայաստանի Միգրացիայի և քաղաքացիության ծառայությունը պաշտոնապես գործարկել է իր առաջին հանրային զանգերի կենտրոնը. կարևոր ինստիտուցիոնալ իրադարձություն, որը փոխում է տեղահանված անձանց և քաղաքացիների Հայաստանում կարևոր տեղեկատվություն և ծառայություններ ստանալու ողջ ընթացքը:
Զանգերի կենտրոնը, որը գործում է 2024 թվականի դեկտեմբերից, Միգրացիայի և քաղաքացիության ծառայության և Եվրոպայի խորհրդի «Հայաստանում տեղահանված բնակչության համար մարդու իրավունքների պաշտպանության երաշխիքների ամրապնդում» ծրագրի հաջողված համագործակցության արդյունք է:
Այս նորամուծությունը լուծում է մի կարևոր խնդիր, որը հասանելի հաղորդակցման միջոցի բացակայությունն էր, ինչն իր հերթին փախստականների առջև ծառացած հիմնական մարտահրավերներից մեկն է, քանի որ նրանք կարիք ունեն պարզաբանելու իրենց օրինական իրավունքներն ու փաստաթղթային խնդիրները: Զանգերի կենտրոնի ստեղծումն արդյունավետորեն լրացնում է այդ բացը` տրամադրելով կենտրոնացված, պրոֆեսիոնալ ծառայություն, որն արդյունավետ կերպով լուծում է բազմաթիվ հարցումներ ինչպես քաղաքացիների, այնպես էլ տեղահանված անձանց կողմից բարձրացված:
Միջոցառման ընթացքում բացման խոսքով հանդես եկան Եվրոպայի խորհրդի ծրագրերի համակարգման տնօրինության բաժնի ղեկավար Շնուց Դյուրը և ՀՀ միգրացիայի և քաղաքացիության ծառայության ղեկավար Նելլի Դավթյանը՝ ընդգծելով, որ «Հաճախ խոսվում է բարձր կոնցեպտուալ արժեքների, միգրացիոն ռազմավարության, միգրացիան ավելի արդյունավետ կառավարելու գործիքակազմերի մասին։ Ինձ հաճախ հարցնում են, թե ինչպես է քաղաքացին բարեփոխումներն զգում իր մաշկի վրա, և ես նշում եմ, թե որքան հսկայական աշխատանք կա կատարելու ետնաբեմում, մինչև որ մենք կկարողանանք բարեփոխումները հասցնել ծառայությունների մատուցման օղակին։ Դրա փայլուն ապացույցը զանգերի կենտրոնի ստեղծումն է, որի անմիջական և ուղիղ շահառուն մեր բնակչությունն է։ Ընդ որում՝ այստեղ չկան շահառու խմբի բնութագրիչներ, այսինքն՝ մեր շահառուները ՀՀ քաղաքացիներն են, օտարերկրյա քաղաքացիներն են, փախստականներն են, տեղահանված բնակչությունն է և նույնիսկ Հայաստանից դուրս գտնվող և Հայաստանով հետաքրքրված մարդիկ են»։
Եվրոպայի խորհրդի ծրագրերի համակարգման տնօրինության բաժնի ղեկավար Շնուց Դյուրն իր հերթին նշեց, որ զանգերի կենտրոնի ստեղծումը մեծ ձեռքբերում է Հայաստան ժամանած փախստականների համար։
«Եվրոպայի խորհուրդը փորձեց հնարավորինս արագ հարմարեցնել իր ծրագրերն ու նախագծերը՝ շեշտը դնելով փախստականներին օգնելու փաթեթի վրա։ Դրա մաս է կազմում նաև այս կենտրոնը» նշեց պարոն Դյուրը։
Հանրությունն այժմ կարող է ուղղակիորեն կապվել Միգրացիայի և քաղաքացիության ծառայության հետ՝ զանգահարելով 84-22 հատուկ համարին, որը հաստատությանը հասանելի է դարձնում բոլոր նրանց համար, ովքեր միգրացիայի հետ կապված ճշգրիտ և անհապաղ տեղեկատվության կարիք ունեն:
***
«Հայաստանում տեղահանված բնակչության համար մարդու իրավունքների պաշտպանության երաշխիքների ամրապնդում» ծրագիրը Հայաստանում փախստականների հոսքին համապարփակ արձագանքման փաթեթի մի մասն է, որի ընդհանուր արժեքը կազմում է 2,8 միլիոն եվրո: Փաթեթը Միգրացիայի և փախստականների հարցերով Գլխավոր քարտուղարի հատուկ ներկայացուցչի 2023 թվականի հոկտեմբերի 11-ից 13-ը կատարած այցի արդյունքն է, որի ընթացքում աջակցության կոնկրետ ոլորտներ, բացահայտվել են ազգային իշխանությունների հետ համատեղ, որոնք համահունչ են Հայաստանի համար Եվրոպայի խորհրդի Գործողությունների ծրագրին (2023-2026թթ.) և Խոցելի անձանց պաշտպանության գործողությունների ծրագրին (2021 և 2025-ի համատեքստում): Ծրագիրն աջակցում է Հայաստանի իշխանություններին տեղահանվածների և փախստականների կարիքները հոգալու հարցում: Այն նաև նպատակ ունի հեշտացնել տեղահանված անձանց իրավունքների և հասանելի ծառայությունների վերաբերյալ տեղեկատվության հասանելիությունը՝ ապահովելով, որ անձինք տեղեկացված լինեն իրենց իրավունքների և հասանելի աջակցության մասին: