Եվրոպայի խորհրդի և պետական մարմինների շարունակական համագործակցության շրջանակում, Հայաստանը քրեակատարողական առողջապահությունում ստեղծել է հեռաբժշկության ներդրման ամուր հիմք և ակնհայտ առաջընթաց է արձանագրվել հեռաբժշկության կիրառման ընդլայնման հարցում։
Նախաձեռնության նպատակն է բարելավել ազատությունից զրկված անձանց մասնագիտացված բժշկական օգնության հասանելիությունը, բարձրացնել առողջապահական ծառայությունների արդյունավետությունը և ապահովել բուժօգնության շարունակականությունը տարբեր հաստատությունների միջև։ Քրեակատարողական հիմնարկներն քաղաքացիական հիվանդանոցների հետ կապելով՝ հեռաբժշկությունն ապահովում է կամուրջ քրեակատարողական և համայնքային առողջապահության միջև՝ հնարավորություն ընձեռելով մասնագետների հետ կանոնավոր խորհրդատվությունների, քրոնիկ հիվանդությունների շարունակական վերահսկման, ինչպես նաև բժշկական կարիքներին ավելի արագ արձագանքման՝ միաժամանակ պահպանելով քրեակատարողական հիմնարկների անվտանգությունը։
Այս նախաձեռնության շրջանակում 2025 թ. սեպտեմբերից նոյեմբեր ամիսներին աջակցություն է տրամադրվել Հայաստանի 10 քրեակատարողական հիմնարկների բուժստորաբաժանումներին։ Աշխատանքներն ընդգրկել են առկա ենթակառուցվածքների, սարքավորումների և յուրաքանչյուր հաստատության տեխնիկական պատրաստվածության անհատականացված գնահատում հեռաբժշկության ներդրման համար, ինչպես նաև՝ առողջապահական անձնակազմի մենթորություն և գործնական խորհրդատվություն՝ հեռաբժշկության օգտագործման և սպասարկման վերաբերյալ։ Վերհանված արդյունքները, ձեռքբերված դասերը և առաջարկվող հետագա քայլերը կնպաստեն հեռաբժշկության կայուն ինտեգրմանը քրեակատարողական առողջապահական համակարգում։
Արդյունքում, Հայաստանի ութ խոշոր քաղաքացիական հիվանդանոցներ միացել են նախաձեռնությանը՝ ձևավորելով քրեակատարողական և քաղաքացիական առողջապահական ծառայություններ մատուցողների միջև հեռաբժշկությամբ խորհրդատվությունների և մասնագիտական աջակցության շրջանակ։ Նոր ֆինանսական և կարգավորող մեխանիզմները այժմ ապահովում են հեռաբժշկության միջոցով մատուցվող բժշկական խորհրդատվությունների փոխհատուցումը, ինչն ապահովում է համակարգի կայուն և ընդլայնվող զարգացման հիմքերը։
Միջոցառումը անցկացվեց Եվրոպայի խորհրդի «Ազատությունից զրկված անձանց իրավունքների պաշտպանության հետագա ամրապնդում» ծրագրի շրջանակում, Եվրոպայի խորհրդի 2023-2026 թվականների՝ Հայաստանի համար գործողությունների ծրագրի շրջանակներում։