ადვოკატთა ასოციაციის ეთიკის კომისიის წევრებმა საკანონმდებლო აქტებსა და რეგულაციებში არსებულ ხარვეზებსა და მათი გადაჭრის გზებზე იმსჯელეს. მრგვალი მაგიდა ა.წ. 19 აგვისტოს გაიმართა ევროსაბჭოსა და ევროკავშირის საერთო პროექტის _“ადვოკატთა ასოციაციის მხარდაჭერის“ ფარგლებში. შეხვედრაზე ფართოდ იყო წარმოდგენილი ეთიკის კომისია, ასოციაციის აღმასრულებელი საბჭო, საერთაშორისო და არასამთავრობო ორგანიზაციები.
მრგვალი მაგიდის მიმდინარეობისას დამსწრეებმა აქტიურად მიმოიხილეს საკანონმდებლო ჩარჩოს ის ნაწილი, რომელიც ცვლილებებს საჭიროებს. ევროსაბჭოს ექსპერტმა, ბ-ნ იოს უიტდეჰააგმა მოკლედ წარმოადგინა ევროპული გამოცდილება და პრობლემის გადაჭრის გზები. ადვოკატთა ასოციაციის თავმჯდომარემ, ბ-ნ ზაზა ხატიაშვილმა კი ხაზი გაუსვა ევროსაბჭოს პროცესში ჩართულობის მნიშვნელობას, რის შემდგომაც ეთიკის კომისიის თავმჯდომარემ წარმოადგინა ის კონკრეტული პრობლემური მუხლები, რომლებიც კომისიის საქმიანობას აფერხებს. შეხვედრისას ასევე გაჟღერდა ეთიკის კომისიის ბაზაზე მომკვლევი იურისტის ინსტიტუტის დანერგვის იდეა. მიუხედავად აზრთა სხვადასხვაობისა, დამსწრეები შეჯერდნენ, რომ ეთიკის კომისიაში „უნდა შეიქმნას სისტემა, რომელიც თავად მუშაობს და არა სისტემა, რომელსაც ინდივიდუალური წევრები ამუშავებენ“.
მრგვალი მაგიდის მონაწილეები შეთანხმდნენ, რომ აქტიურად გააგრძელებენ საკანონმდებლო ცვლილებებზე მუშაობას, ეთიკის კომისიის ბაზაზე დაარსებული საკანონმდებლო ცვლილებების ჯგუფისა და ევროსაბჭოს ექსპერტის მხარდაჭერით.