ევროპის საბჭოს ორგანიზებით, საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტთან თანამშრომლობის ფარგლებში, ჩატარდა სემინარი თემაზე „გამოხატვის თავისუფლების სტანდარტები და მედიის პროფესიული რეგულირება: ევროპის საბჭოსა და ევროკავშირის სტანდარტები“.
ორ დღიან, ჰიბრიდული ფორმატის ღონისძიებას ესწრებოდნენ როგორც პარლამენტის წევრები, ასევე ზემოთაღნიშნული საპარლამენტო კომიტეტის წარმომადგენლები. სემინარი შეეხო ორ ძირითად თემას: გამოხატვის თავისუფლება ადამიანის უფლებათა ევროპული კონვენციის ჭრილში და მედიის პროფესიული რეგულირება. ორივე საკითხის გარშემო დისკუსიის ფასილიტაცია მოახდინეს ევროპის საბჭოს ექსპერტებმა.
გამოხატვის თავისუფლების კონტექსში, მსჯელობა შეეხო მედიის თავისუფლებასა და ადამიანის უფლებათა ევროპული სასამართლოს მიერ დადგენილ შესაბამის სტანდარტებს. წარმოჩენილ იქნა განსხვავება სიძულვილის ენასა და უხამსობას შორის, განხილულ იქნა ცილისწამების შემთხვევები, ასევე გამოხატვის თავისუფლებასა და სხვა ფუნდამენტურ უფლებებს შორის ბალანსის საკითხი, ევროპული სასამართლოს პრაქტიკის გათვალისწინებით.
პროფესიული მედიის რეგულირების მხრივ კი, დისკუსია დაეთმო ნორმატიული რეგულირების, თანარეგულირებისა და თვით-რეგულირების სისტემების ანალიზს, ზოგიერთი ევროპული ქვეყნის მაგალითზე დაყრდნობით. ასევე განხილულ იქნა ევროკავშირის დირექტივა აუდიო-ვიზუალური მედია სერვისების (EU AVMSD) შესახებ, და მის ფარგლებში დაწესებული მოთხოვნები, პროფესიული მედიისა და მედიის კონტენტის რეგულირების მიმართულებით. და ბოლოს, ევროპის საბჭოს ექსპერტებმა მიმოიხილეს საქართველოში არსებული მედიის პროფესიული რეგულირების სისტემის შესაბამისობა ევროკავშირის ზემოთხსენებულ დირექტივასთან. დისკუსიის საგანი იყო მაუწყებლობის შესახებ კანონში შესატანი საკანონმდებლო ცვლილებების პაკეტიც, რომელიც რამდენიმე წლის წინ შემუშავდა. ამდენად, შეხვედრის მონაწილეებს შესაძლებლობა მიეცათ აღნიშნული ცვლილებების ევროკავშირის დირექტივასთან (EU AVMSD) შესაბამისობის თაობაზე შეხედულებების ურთიერთგაზიარება მოეხდინათ.
აქტივობა, ფართო კონტექსტში, ეხება საქართველოს მიერ აღებულ ვალდებულებას, მოახდინოს მედიის შესახებ კანონმდებლობის ჰარმონიზება ევროკავშირის დირექტივასთან აუდიო-ვიზუალური მედია სერვისების შესახებ, რაც საქართველო-ევროკავშირს შორის დადებული ასოცირების შეთანხმებითაა გათვალისწინებული. ევროპის საბჭო გეგმავს საკანონმდებლო ცვლილებების პროცესის ფასილიტაციას, ევროპის მასშტაბით, მედიის პროფესიული რეგულირების კუთხით დაგროვილი გამოცდილების შესახებ ინფორმაციისა და შესაბამისი ექსპერტიზის მიწოდების გზით. ევროპის საბჭო ხელს შეუწყობს დისკუსიასა და დიალოგს დაინტერესებულ მხარეებს შორის, რათა უზრუნველყოფილ იქნას გადაწყვეტილებების მიღების ინკლუზიური პროცესი.
მოცემული აქტივობა განხორციელდა „მედიის თავისუფლების, ინტერნეტ მმართველობისა და პერსონალურ მონაცემთა გაძლიერება საქართველოში“ პროექტის ფარგლებში, რომელიც დაფინანსებულია საქართველოში ევროპის საბჭოს 2020-2023 წლების სამოქმედო გეგმის მიერ.
