ევროპის საბჭოს პროექტის „მედიის თავისუფლების, ინტერნეტ მმართველობისა და პერსონალურ მონაცემთა გაძლიერება საქართველოში“ ფარგლებში, ხელოვნური ინტელექტისა და პერსონალურ მონაცემთა დაცვის თემაზე ახალი მიმართულების განხორციელება დაიწყო.
პროექტის ახალ მიმართულებაზე მუშაობა, სახელმწიფო ინსპექტორის სამსახურთან აქტიურ თანამშრომლობას ითვალისწინებს. კერძოდ, დაგეგმილია სახელმწიფო ინსპექტორის სამსახურის თანამშრომელთა უნარ-ჩვევების განვითარება ხელოვნური ინტელექტის დარგში, ევროპის საბჭოს ექსპერტიზის გამოყენების გზით. აღნიშნული, თავის მხრივ, მოიცავს კვლევის ჩატარებას, ტრენინგების ორგანიზებასა და სამსახურისთვის შესაბამისი პოლიტიკის შემუშავებას. შედეგად, სახელმწიფო ინსპექტორის სამსახური, შეძენილი ცოდნისა და უნარების დახმარებით, უზრუნველყოფს ხელოვნური ინტელექტის ინსტრუმენტების მონიტორინგსა და პერსონალურ მონაცემთა დაცვას საქართველოში.
აღნიშნული მიმართულების დაწყება, საქართველოში, კერძო და საჯარო უწყებების მიერ ხელოვნური ინტელექტის ინსტრუმენტების მზარდმა გამოყენებამ განაპირობა, რაც, თავის მხრივ, კონფიდენციალობისა და პერსონალური მონაცემების დაცვის საჭიროებას ხდის აქტუალურს.
ახალი ინიციატივის პრეზენტაცია ონლაინ ფორმატში გაიმართა, რომელსაც საჯარო და კერძო სექტორის, აკადემიური წრის, საერთაშორისო და სამოქალაქო ორგანიზაციების 50-მდე წარმომადგენელი დაესწრო.
ღონისძიება ევროპის საბჭოს ოფისის ხელმძღვანელის მოადგილემ, შტეფან სირბუმ და სახელმწიფო ინსპექტორის მოადგილემ, სოფიო ჯიაძემ გახსნეს. შეხვედრის მიზანი იყო (1) ხელოვნური ინტელექტისა და პერსონალურ მონაცემთა დაცვის სფეროში დაგეგმილი აქტივობების შეჯერება, ჩართულ მხარეთა გეგმებისა და აქტივობების კოორდინაციისათვის და (2) დაინტერესებულ მხარეთა მოწოდება დაგეგმილ აქტივობების ფარგლებში აქტიური თანამშრომლობისაკენ, გადაწყვეტილებების მიღების პროცესის გამჭვირვალობისა და ჩართულობის უზრუნველსაყოფად. გამართული დისკუსიისას, საჯარო ინსტიტუტების ერთმანეთთან დაკავშირება და ქვეყანაში, ხელოვნური ინტელექტის პოლიტიკის განვითარების კუთხით სამომავლო თანამშრომლობასა და კოორდინაციის თაობაზე ურთიერთშეთანხმება მოხდა.
პროექტი „მედიის თავისუფლების, ინტერნეტ მმართველობისა და პერსონალურ მონაცემთა გაძლიერება საქართველოში“, ევროპის საბჭოს 2021-2023 წლების სამოქმედო გეგმის ფარგლებშია დაფინანსებული.
