ოთხშაბათს, 13 ნოემბერს 10:00 – 17.00 საათზე სასტუმრო „თბილისი რუმსში“ (მერაბ კოსტავას 14) გაიხსნა ინტერნეტ მმართველობის რიგით მეხუთე ფორუმი GeoIGF 2019. ფორუმის თემა იყო საქართველოს ინტერნეტ სივრცის მთავარი გამოწვევები.
ფორუმი გახსნეს ნიკოლოზ ალავიძემ - ეკონომიკისა და მდგრადი განვითარების მინისტრის მოადგილე, კრისტიან ურსემ - ევროპის საბჭოს საქართველოს ოფისის ხელმძღვანელი, ფრედერიკ დონკმა - ინტერნეტ საზოგადოების (ISOC) ევროპული ბიუროს დირექტორი, ვაჰან ჰოვსეფიანმა - IP მისამართების ევროპული საკოორდინაციო ცენტრის (RIPE NCC) საგარეო ურთიერთობების ოფისი; ნატალია მოჩუმ - მინიჭებული სახელების და ნომრების ინტერნეტ კორპორაციის (ICANN) გლობალური ჩართულობის მენეჯერი აღმოსავლეთ ევროპასა და ცენტრალურ აზიაში.
ფორუმს დაესწრო 200-ზე მეტი მონაწილე სახელმწიფო, კერძო და არასამთავრობო სექტორებიდან ისევე, როგორც საერთაშორისო ორგანიზაციებიდან. ფორუმის სპიკერები იყვნენ საერთაშორისო ექსპერტები და საქართველოში ინტერნეტ მმართველობის საკითხებში ჩართული მხარეების წარმომადგენლები.
GeoIGF2019-ის ფარგლებში განხილულ იქნა საქართველოს ფართოზოლოვანი დაფარვის და 5G ტექნოლოგიის დანერგვის საკითხები, კონტენტი და ინტელექტუალური საკუთრების უფლებები ინტერნეტში, ონლაინ მედია რეგულაციები და ბავშვების დაცვა მავნე ზეგავლენისგან, ე.წ. ნივთების ინტერნეტი (IoT), პერსონალურ მონაცემთა დაცვა და ა.შ.
ღონისძიება ორგანიზებული იყო ევროპის საბჭოს (CoE) პროექტის „მედიისა და ინტერნეტის თავისუფლების ხელშეწყობა საქართველოში“ მხარდაჭერით, ასევე, ISOC, ICANN, RIPE NCC და ინტერნეტ მმართველობის ფორუმის მხარდამჭერი ასოციაციის (IGFSA) მხარდაჭერით.
საქართველოს ინტერნეტ მმართველობის ფორუმი ყოველწლიურად იმართება 2015 წლიდან. ის ხელს უწყობს ყველა აქტუალური საკითხის გარშემო მხარეებს შორის დიალოგს, მეტ ინფორმირებულობას და ჩართულობას. მისი მთავარი მიზანია ადამიანის უფლებების დაცვა ინტერნეტ სივრცეში.
