პირველად საქართველოში, გორის მუნიციპალიტეტმა წარმატებით გამოიყენა ევროპის საბჭოს მეთოდოლოგია „გადაწყვეტილების მიღების პროცესში სამოქალაქო ჩართულობის მექანიზმი“ მუნიციპალიტეტის საშუალოვადიანი განვითარების გეგმის ინკლუზიურად შემუშავებისთვის.

„გადაწყვეტილების მიღების პროცესში სამოქალაქო ჩართულობის მექანიზმი“ (CP Tool) არის ევროპის საბჭოს სამოქალაქო მონაწილეობის მეთოდოლოგია, რომელიც წარმოადგენს ადგილობრივი ხელისუფლებისთვის სახელმძღვანელო დოკუმენტს  სამოქალაქო მონაწილეობის მხარდასაჭერად კონტექსტზე დაფუძნებული სტრატეგიების შემუშავებასა და განხორციელებაში.

გორის მერიისა და საკრებულოს წარმომადგენლებისთვის განხორციელებული ტრენინგის შემდეგ, მერის ბრძანებით შეიქმნა CP Tool-ის გამოყენების ფორმალური მარეგულირებელი ბაზა. ბრძანების საფუძველზე ასევე შეიქმნა მერიისა და სამოქალაქო საზოგადოების წარმომადგენლებით დაკომპლექტებული ადგილობრივი მონაწილეობის სამუშაო ჯგუფი, როგორც პასუხისმგებელი ორგანო მეთოდოლოგიის განხორციელებაზე.

სამუშაო ჯგუფმა ჩაატარა სემინარებისა და შეხვედრების სერია თემის შეფასების, დაინტერესებული მხარეების იდენტიფიცირებისა და შეფასების განსახორციელებლად.  CP Tool დაეხმარა მუნიციპალიტეტს განესაზღვრა რამდენად მზადაა ადგილობრივი საზოგადოება ჩაერთოს სტრატეგიული დოკუმენტის შემუშავების პროცესში. ინსტრუმენტის გამოყენებით ჯგუფმა ასევე გამოავლინა დაინტერესებული მხარეები, შეაფასა მათი ინტერესები და რელევანტურობა და შეიმუშავა მონაწილეობის სტრატეგია, მათ შორის, კომუნიკაციის რეკომენდებული ფორმები და მექანიზმები, რათა მუნიციპალიტეტმა უზრუნველყოს დაინტერესებული მხარეების ეფექტური ჩართულობა პროცესში. ევროპის საბჭოს სამოქალაქო ჩართულობის მეთოდოლოგიის გამოყენება საშუალებას აძლევს მუნიციპალიტეტს, მუნიციპალური გეგმა თანამონაწილეობითი პროცესით შეიმუშაოს

„გადაწყვეტილების მიღების პროცესში სამოქალაქო ჩართულობის მექანიზმის“ პილოტირება გორის მუნიციპალიტეტში განხორციელდა ევროპის საბჭოს პროექტის „მონაწილეობითი დემოკრატიისა და ადამიანის უფლებების გაძლიერება ადგილობრივ დონეზე საქართველოში“ ფარგლებში დემოკრატიისა და ადამიანის ღირსების გენერალური დირექტორატის არჩევნებისა და მონაწილეობითი დემოკრატიის სამმართველოს მიერ, საქართველოსთვის ევროპის საბჭოს 2020-2023 სამოქმედო გეგმის ფარგლებში, ავსტრიის განვითარების თანამშრომლობის ფინანსური მხარდაჭერით.