2026 წლის 9 ოქტომბერს, თბილისში გამართულ მმართველი კომიტეტის შეხვედრაზე, ევროპის საბჭომ და საქართველოს საგარეო საქმეთა სამინისტრომ შეაფასეს ერთობლივი საქმიანობა, განსაზღვრეს საქართველოსთვის ევროპის საბჭოს 2024-2027 წლების სამოქმედო გეგმის დასკვნითი წლის პრიორიტეტები და სამომავლო თანამშრომლობაზე იმსჯელეს.

შეხვედრა გახსნეს საქართველოს საგარეო საქმეთა მინისტრის მოადგილე ლაშა დარსალიამ და ევროპის საბჭოს პროგრამების კოორდინაციის დირექტორატის ხელმძღვანელმა კლაუს ნეუკირჩმა. შეხვედრაში მონაწილეობდნენ საქართველოს ხელისუფლებისა და პარტნიორი უწყებების წარმომადგენლები, მათ, ევროპის საბჭოს წარმომადგენლებთან ერთად მიმოიხილეს მიღწეული შედეგები და არსებული გამოწვევები ევროპის საბჭოს სამი ძირითადი მიმართულების - ადამიანის უფლებების, კანონის უზენაესობისა და დემოკრატიის კუთხით.

მმართველი კომიტეტის შეხვედრა საქართველოსთვის ევროპის საბჭოს სამოქმედო გეგმის ფარგლებში მიმდინარე ფართო საკონსულტაციო პროცესის ნაწილია, რომელშიც ყველა დაინტერესებული მხარე მონაწილეობს.

დისკუსიები შეეხო ქალთა და ბავშვთა უფლებების დაცვას, მართლმსაჯულების დამოუკიდებლობასა და ეფექტიანობას, ადამიანის უფლებათა ევროპული სასამართლოს გადაწყვეტილებების აღსრულებას, გამოხატვისა და მედიის თავისუფლებას, ნარკოტიკების მოხმარების პრევენციას, დემოკრატიულ მონაწილეობასა და მმართველობას.

მონაწილეებმა განიხილეს არა მხოლოდ განხორციელებული საქმიანობა, არამედ შეაფასეს, რა შეიცვალა საქართველოსთვის ევროპის საბჭოს სამოქმედო გეგმის განხორციელების შედეგად, რომელ სფეროებში სჭირდებათ ინსტიტუტებს დამატებითი მხარდაჭერა და რამდენად სათანადოდ აისახება ევროპის საბჭოს სტანდარტები საქართველოს კანონმდებლობასა და პრაქტიკაში.

სამოქმედო გეგმის ფარგლებში ევროპის საბჭო ქართველ პარტნიორებთან თანამშრომლობით ხელს უწყობს რეფორმებსა და საქართველოს კანონმდებლობის, ინსტიტუტებისა და პრაქტიკის დაახლოებას ადამიანის უფლებების, კანონის უზენაესობისა და დემოკრატიის ევროპულ სტანდარტებთან.

შეხვედრის მონაწილეებმა ასევე განსაზღვრეს 2027 წლის პრიორიტეტები და განიხილეს  სამომავლო თანამშრომლობის მიმართულებები, მათ შორის, საქართველოსთვის ევროპის საბჭოს 2028-2031 წლების ახალი სამოქმედო გეგმის შემუშავების შესაძლებლობა. სამომავლო თანამშრომლობის ნებისმიერი შესაძლო ჩარჩო დაეფუძნება მიმდინარე სამოქმედო გეგმის განხორციელების გამოცდილებასა და  აღნიშნული საკონსულტაციო პროცესის შედეგად გამოვლენილ საჭიროებებს.

„დღევანდელი შეხვედრები განვლილი გზის შეჯამებას, მიღებული გამოცდილების შეფასებასა და სამომავლო საჭიროებების განხილვას ემსახურება“, - აღნიშნა ევროპის საბჭოს პროგრამების კოორდინაციის დირექტორატის ხელმძღვანელმა კლაუს ნეუკირჩმა. „მინდა მადლობა გადავუხადო სამოქმედო გეგმის განხორციელებაში ჩართულ ყველა დაინტერესებულ მხარეს და პარტნიორს თანამშრომლობისთვის. მხოლოდ ერთობლივი მუშაობით შევძლებთ ხელშესახები შედეგების მიღწევას.“

საქართველოსთვის ევროპის საბჭოს 2024-2027 წლების სამოქმედო გეგმა მინისტრთა კომიტეტმა 2023 წლის 18 ოქტომბერს მიიღო, ხოლო ევროპის საბჭომ და საქართველომ ის ოფიციალურად თბილისში 2024 წლის 18 იანვარს წარადგინეს. სამოქმედო გეგმა წარმოადგენს სტრატეგიული პროგრამირების ინსტრუმენტს, რომლის მიზანია საქართველოს კანონმდებლობის, ინსტიტუტებისა და პრაქტიკის შემდგომი დაახლოება ადამიანის უფლებების, კანონის უზენაესობისა და დემოკრატიის ევროპულ სტანდარტებთან, აგრეთვე ქვეყნის ძალისხმევის მხარდაჭერა ევროპის საბჭოს წევრი სახელმწიფოს ვალდებულებების შესრულებაში.