2025 წლის 24 აპრილს ევროპის საბჭოს პროექტის „ბავშვთა მიმართ ძალადობის წინააღმდეგ ბრძოლა საქართველოში“ სამეთვალყურეო კომიტეტმა მიიღო სიტუაციური ანალიზის ყოვლისმომცველი ანგარიში და მიზნობრივი რეკომენდაციები, რომლებიც მიზნად ისახავს ბავშვთა მიმართ სექსუალური ძალადობის წინააღმდეგ რეაგირების გაძლიერებას და მსხვერპლ ბავშვთა დაცვის გაუმჯობესებას საქართველოში.
ანგარიში წარმოადგენს კონკრეტულ გზამკვლევს საქართველოს სამართლებრივი, პოლიტიკური და ინსტიტუციური ჩარჩოების ევროპის საბჭოსა და სხვა საერთაშორისო სტანდარტებთან შესაბამისობაში მოსაყვანად, პრაქტიკაში არსებული დაბრკოლებების გადაჭრის მიზნით. ანალიზი, რომელიც შემუშავდა ინკლუზიური და მონაწილეობითი პროცესის მეშვეობით, ეროვნული და საერთაშორისო ექსპერტების მონაწილეობით, ეფუძნებოდა სახელმწიფო ინსტიტუტებთან, სამოქალაქო საზოგადოების ორგანიზაციებთან, მშობლებთან და ბავშვთა დაცვის სისტემაში მომუშავე პროფესიონალებთან ფართო კონსულტაციებს.
ანგარიშში დადასტურდა, რომ საქართველომ ბოლო წლებში მნიშვნელოვან პროგრესს მიაღწია კანონმდებლობის გაძლიერების, ინსტიტუციური კოორდინაციის გაუმჯობესებისა და ბავშვთა დაცვის სერვისების გაფართოების გზით. ამავდროულად, გამოვლინდა ისეთი ხარვეზები, მათ შორის სამართლებრივი ნორმების არათანმიმდევრული გამოყენება პრაქტიკაში, ასევე ქცევითი და ინსტიტუციური ბარიერები, რომლებიც ზღუდავს ბავშვთა ეფექტიან დაცვას.
მიღებული რეკომენდაციები ფოკუსირებულია პრაქტიკაში ბავშვთა დაცვის გაუმჯობესებაზე, ინსტიტუციური ანგარიშვალდებულების გაძლიერებაზე, სააგენტოთაშორისი თანამშრომლობის გაძლიერებასა და ბავშვთა მიმართ სექსუალური ძალადობის შემთხვევებში ბავშვზე ორიენტირებული მიდგომების ხელშეწყობაზე. პროცესმა ასევე წაახალისა დაინტერესებული მხარეების უფრო აქტიური ჩართულობა და გაამყარა შემოთავაზებული რეფორმების მიმართ პასუხისმგებლობა.
ანგარიშისა და მისი რეკომენდაციების მიმართ მხარდაჭერის გამოხატვით, მონაწილე სახელმწიფო ინსტიტუტებმა აიღეს ვალდებულება, რომ თანდათანობით გააგრძელონ რეფორმები, რომლებიც მიზნად ისახავს საქართველოში ყველა ბავშვისთვის უფრო უსაფრთხო და ეფექტური დაცვის მექანიზმების უზრუნველყოფას.
აქტივობა განხორციელდა ევროპის საბჭოს პროექტის „ბავშვთა მიმართ ძალადობის წინააღმდეგ ბრძოლა საქართველოში“ ფარგლებში, რომელიც ხორციელდება ევროპის საბჭოს 2024–2027 წლების სამოქმედო გეგმის ფარგლებში.
+99532 2913870/ 71/ 72