Եվրոպայի խորհուրդը ՀՀ ներքին գործերի նախարարության հետ համատեղ նոյեմբերի 21-ին, 23-ին և 30-ին Երևանում կազմակերպել էր երեք կլոր սեղան-քննարկում՝ նվիրված Ոստիկանության գվարդիայի մասին նոր օրենքին և հարակից իրավական ակտերին։ Քննարկումների նպատակն էր ստեղծել ընդհանուր հարթակ, որպեսզի համապատասխան պետական մարմինների ներկայացուցիչները, ոլորտի առանցքային մասնագետները, քաղաքականություն մշակողներն ու փորձագետները, միջազգային և հասարակական կազմակերպությունների ներկայացուցիչները, ինչպես նաև Ազգային ժողովի անդամները հնարավորություն ստանան քննարկելու օրենսդրական նոր նախաձեռնությունը, որը մշակվել է Եվրոպայի խորհրդի փորձագիտական աջակցությամբ։
Համաձայն ՀՀ կառավարության 2021-2026 թթ․ գործողությունների ծրագրի, ՀՀ ոստիկանության բարեփոխումների ռազմավարությանը և ՀՀ մարդու իրավունքների պաշտպանության ազգային ռազմավարությանը՝ հավաքների ազատության իրավունքի վերաբերյալ բարեփոխումներին աջակցելու նպատակով Ծրագրի կողմից տրամադրվում է փորձագիտական աջակցություն և կազմակերպվում են կարողությունների զարգացմանն ուղղված միջոցառումներ։
Ոստիկանության բարեփոխումը տևական և համալիր գործընթաց է, որը պահանջում է հստակ տեսլականի առկայություն և դրա իրացման ճանապարհների ուրվագծում։ Այդ բարեփոխումը ներառում է նաև ոստիկանության զորքերի ապառազմականացումը, դրանց կարգավիճակի, հետևաբար, և լիազորությունների վերանայումը, ինչպես նաև այն լուծումների մշակումը, որոնք թույլ կտան վերջիններիս կողմից առավել արդյունավետ իրականացնել հասարակական կարգի պահպանության գործառույթը, այդ թվում՝ երաշխավորելով յուրաքանչյուրի՝ խաղաղ հավաքներին ազատորեն մասնակցելու իրավունքի պատշաճ իրականացումը։
Ակնկալվում է, որ նոր օրենքի հիման վրա ձևավորված ոստիկանական ուժերը զանգվածային հրապարակային միջոցառումների ընթացքում պետք է ունենան նաև հասարակական կարգը պահպանելու գործառույթ։ Հետևաբար օրենքով պետք է կարգավորվի նաև հրապարակային միջոցառումների ընթացքում ոստիկանության ծառայողների կողմից ֆիզիկական ուժի, հատուկ միջոցների և զենքի կիրառման իրավաչափությունն ու համարժեքությունը՝ միջազգային չափանիշներին և Մարդու իրավունքների եվրոպական դատարանի (ՄԻԵԴ) նախադեպային իրավունքին համապատասխան՝ այդպիսով նպաստելով ՄԻԵԿ 2-րդ, 3-րդ, 5-րդ և 11-րդ հոդվածի համաձայն Հայաստանի դեմ կայացված ՄԻԵԴ վճիռների կատարմանը (Մուշեղ Սաղաթելյանն ընդդեմ Հայաստանի վճիռների խումբ և Վիրաբյանն ընդդեմ Հայաստանի վճիռների խումբ):
Քննարկումները կազմակերպվել էին «Աջակցություն Հայաստանում Մարդու իրավունքների եվրոպական դատարանի վճիռների արդյունավետ կատարմանը»ծրագրի շրջանակներում, որն իրականացվում է Եվրոպայի խորհրդի՝ Հայաստանի համար 2023-2026 թթ․ Գործողությունների ծրագրի շրջանակներում և ֆինանսավորվում է Մարդու իրավունքների հավատարմագրային հիմնադրամի կողմից։
