Հայաստանի Հանրապետության դատախազները, դատավորները, Արդարադատության ակադեմիայի և Արդարադատության նախարարության ներկայացուցիչները մասնակցեցին երկօրյա ինտերակտիվ աշխատաժողովի՝ նվիրված Հայաստանի քրեական օրենսգրքի և քրեական դատավարության օրենսգրքի արդյունավետ կիրառմանը՝ արձանագրելով ատելության դեպքերին և խտրականությանը համարժեք արձագանքելու կարևորությունը։
Աշխատաժողովի ընթացքում քննարկվեցին կողմնակալության դրդապատճառի և կողմնակալության դրդապատճառով հանցագործությունների, արդյունավետ վերասոցիալականացման քաղաքականության, մարդու իրավունքների էական և դատավարական պարտավորությունների միջև տարբերության, ինչպես նաև խտրականության բնութագրերի վերաբերյալ հարցեր՝ համաձայն Հայաստանի Հանրապետության գործող օրենսդրության և Եվրոպայի խորհրդի չափորոշիչների: Մասնակիցները հնարավորություն ունեցան ոչ միայն արտահայտել իրենց տեսակետները առկա խնդիրների վերաբերյալ, այլև մասնակցել իրական դեպքերը վերարտադրող վարժությունների՝ ամրապնդելով խտրականության հիմքերը ճշգրիտ նույնականացնելու իրենց հմտությունները:
Մարդու իրավունքների եվրոպական դատարանի նախադեպային իրավունքի վերաբերյալ մանրակրկիտ ուսումնասիրությունը և հետագա գործողությունները լրացուցիչ արժեք ապահովեցին մասնակիցների կողմից ներառական քաղաքականությունը և մոտեցումները քննարկելու համար, ինչը հատկապես կարևորվեց դատարանների աշխատանքի, ընթացիկ օրենսդրական բարեփոխումների և դատախազների առջև ծառացած գործնական մարտահրավերների համատեքստում։
Ստեղծելով վերոնշյալ շահագրգիռ մարմինների միջև անմիջական հաղորդակցության հարթակ՝ աշխատաժողովը խթանեց այս ոլորտում գործող իրավական չափորոշիչների իրականացման արդյունավետ համակարգումը։
Սույն միջոցառումը Եվրոպական միության և Եվրոպայի խորհրդի «Գործընկերություն հանուն լավ կառավարման» համատեղ ծրագրի մի մասն է, որը համաֆինանսավորվում է Եվրոպական միության և Եվրոպայի խորհրդի կողմից և իրականացվում է Եվրոպայի խորհրդի կողմից՝ «Հավասարության խթանումը և խտրականության բացառումը Հայաստանում» ծրագրի շրջանակներում։