Վարչապետ Նիկոլ Փաշինյանի կողմից Ապակենտրոնացման քաղաքականության հայեցակարգի հաստատումից հետո ՝ գործընթացի հիմքում դնելով Տեղական ինքնակառավարման եվրոպական խարտիայի կարևորությունը, ավելի քան 50 շահագրգիռ կողմեր կենտրոնական և տեղական իշխանություններից, քաղաքացիական հասարակությունից և միջազգային հանրությունից հավաքվել էին քննարկելու այն հիմնական հայեցակարգային դրույթները, որոնք պետք է արտացոլվեն «Տեղական ինքնակառավարման մասին» պատրաստվող նոր օրենքում։
Քննարկումը բացեց ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը՝ բարձրացնելով տեղական ինքնակառավարման համակարգի վերանայման հարցում հավակնոտ նպատակներ սահմանելու անհրաժեշտությունը։ Շնորհակալություն հայտնելով Եվրոպայի խորհրդին ի սկզբանե Հայաստանի հետ կողք կողքի քայլելու համար՝ ի պաշտպանություն տեղական ինքնակառավարման մարմինների, նա նշեց, որ օրենսդրական դաշտի փոփոխությունները պետք է լինեն բովանդակային, այլ ոչ թե ֆորմալ՝ արտացոլելու խոշորացման վերջին բարեփոխումների ազդեցությունը:
Աշխույժ և ակտիվ բանավեճի ժամանակ շոշափվեցին լավ ժողովրդավարական կառավարման հիմունքները, այդ թվում՝ տեղական ինքնակառավարման մարմինների ձևավորումը, համայնքապետերի և ավագանիների հարաբերությունները, տեղական ինքնակառավարման մարմինների գործողությունների վերահսկումը, ընտրված ներկայացուցիչների և մարմինների ժողովրդավարական հաշվետվողականությունը և տեղական ժողովրդավարական կյանքում քաղաքացիական մասնակցության արդյունավետ մեխանիզմների ապահովման անհրաժեշտությունը:
Մի քանի մասնակիցներ մատնանշեցին Եվրոպայի խորհրդի կողմից կազմակերպված Համայնքային խորհրդակցությունների այս նախաձեռնությունների կողմից ստեղծված հնարավորությունների կարևորությունը: Իրավական դաշտի բարեփոխման մեջ շահագրգիռ կողմերի ներդրումը չափազանց կարևոր է տեղական ինքնակառավարման և բարեփոխումների հետագա իրականացումն ապահովելու համար՝ համաձայն Տեղական ինքնակառավարման եվրոպական խարտիայի հոդվածի 4-րդ կետի, որը նախատեսում է տեղական ինքնակառավարման մարմինների հետ խորհրդակցություններ՝ իրենց հետ ուղղակիորեն առնչվող հարցերում:
Մասնակիցներից մեկն ընդգծեց օրենքների և քաղաքականության գենդերային զգայունության ապահովման կարևորությունը, մյուսները ընդգծեցին օրենքը պարզ և ռազմավարական պահելու անհրաժեշտությունը: Մի քանիսն ընդգծեցին համայնքային ծառայողների կարգավիճակի բարելավման և կարողությունների արդյունավետ զարգացման/ՏԻՄ վերապատրաստման ծրագրի հաստատման կարևորությունը, որը կօգնի ապահովել տեղական ինքնակառավարման կայունությունը: Բոլորը համակարծիք էին այս ձևաչափով հետագա քննարկումների անհրաժեշտության մասին։
Հանդիպումը կազմակերպվել է Հայաստանում Ժողովրդավարական զարգացում, ապակենտրոնացում և լավ կառավարում – Փուլ II (DDDGGA) ծրագրի շրջանակներում, որն իրականացվում է Հայաստանի համար Եվրոպայի խորհրդի գործողությունների ծրագրի համատեքստում` Ավստրիական զարգացման համագործակցության ֆինանսավորմամբ: