ՀՀ իշխանությունները և Եվրոպայի խորհուրդը ամփոփում են գործող Գործողությունների ծրագրի շրջանակներում իրականացված առաջընթացը՝ միաժամանակ նախանշելով2027-2030 թվականների համագործակցության նոր ուղին, որն ուղղված է ժողովրդավարական կառավարման, մարդու իրավունքների և իրավունքի գերակայության ամրապնդմանը և երկարաժամկետ ազդեցության ապահովմանը։
Ղեկավար կոմիտեին դիմելով՝ Արտաքին գործերի նախարարի տեղակալ Ռոբերտ Աբիսողոմոնյանը ընդգծեց արդյունավետ համագործակցության շարունակականության և համատեղ բարեփոխումների ջանքերի համակարգված առաջմղման կարևորությունը։
Եվրոպայի խորհրդի Ծրագրերի համակարգման տնօրեն Կլաուս Նոյկիրխը ողջունեց մինչ այժմ ձեռք բերված շոշափելի արդյունքները և բարեփոխումները առաջ մղող կառուցողական գործընկերությունը՝ գովաբանելով Հայաստանի իշխանություններին Եվրոպայի խորհրդի հետ գերազանց համագործակցության, ինչպես նաև 2023-2026 թվականների ներկայիս Գործողությունների ծրագրի իրականացման գործում ցուցաբերած հանձնառության և ակտիվ ներգրավվածության համար։
2023 թվականի փետրվարին պաշտոնապես մեկնարկած Եվրոպայի խորհրդի ընթացիկ Գործողությունների ծրագիրը առանցքային նախաձեռնություն է, որի նպատակն է Հայաստանի օրենսդրությունը, ինստիտուցիոնալ համակարգը և գործելակերպը առավել համահունչ դարձնել եվրոպական չափանիշներին։ Գործողությունների ծրագրի ռազմավարական կարևորությունը վերահաստատվեց նաև Գլխավոր քարտուղար Ալեն Բերսեի 2025 թվականի հունիսին Հայաստան կատարած այցի ժամանակ։
Ընթացիկ Գործողությունների ծրագրի շրջանակներում Հայաստանի իշխանությունները, որոնց աջակցում է Եվրոպայի խորհուրդը, առաջ են մղում բարեփոխումներ՝ մարդու իրավունքների, սոցիալական պաշտպանության և երեխաների իրավունքների ամրապնդման համար՝ միաժամանակ պայքարելով կանանց նկատմամբ բռնության դեմ։ Գործողությունների ծրագիրը նաև կենտրոնանում է արդարադատության մատչելիության, արդարադատության համակարգերի բարելավման, լրատվամիջոցների ազատության խթանման, կոռուպցիայի և կիբեռհանցագործության դեմ պայքարի, խտրականության դեմ պայքարի, քրեակատարողական հաստատություններում առողջապահության բարելավման, պրոբացիայի աջակցության և տեղական ինքնակառավարման բարեփոխումների առաջխաղացման վրա։
Ձեռք բերված առաջընթացի հիման վրա հանդիպումը նաև ազդարարեց Եվրոպայի խորհրդի Հայաստանի համար 2027-2030 թվականների Գործողությունների ծրագրի նախապատրաստական գործընթացի վերաբերյալ քննարկումների մեկնարկը: Առաջիկա Գործողությունների ծրագրի առանցքում են մարդու իրավունքների պաշտպանությունը, արդարադատության և ժողովրդավարական կառավարման ոլորտներում բարեփոխումների ամրապնդումը, առաջացող մարտահրավերներին արձագանքելու ուղիները և ընթացիկ նախաձեռնությունների կայունության ապահովումը:
Նույն օրը նաև տեղի ունեցավ ԵՄ-ԵԽ «Գործընկերություն հանուն լավ կառավարման» (ԳԼԿ) տեղական ղեկավար կոմիտեի հանդիպումը։ Վերջին երեք տարիների ընթացքում հայ գործընկերների հետ համատեղ ջանքերը նպաստել են արդյունավետ և թափանցիկ դատական ընթացակարգերի արդյունավետությանը և թափանցիկությանը, արդարադատության հասանելիության բարելավմանը, մասնավորապես կանանց համար, ինչպես նաև ինստիտուտների նկատմամբ հանրային վստահության բարձրացմանը։ Կատարելագործված գործիքակազմը ամրապնդել է կոռուպցիայի և տնտեսական հանցագործության դեմ պայքարը, միևնույն ժամանակ, խտրականության և ատելության դեմ պայքարի ուղղությամբ իրականացվող միջոցառումները նպաստել են ավելի ներառական համայնքների ձևավորմանը: Այս նվաճումները ցույց են տալիս, թե ինչպես է Հայաստանի իշխանությունների, Եվրոպական Միության և Եվրոպայի խորհրդի միջև շարունակական համագործակցությունը շոշափելի և երկարատև օգուտներ բերում երկրի ողջ բնակչությանը։
Եվրոպայի խորհրդի Հայաստանի համար 2023-2026թթ․ Գործողություննների ծրագիր
Եվրոպայի խորհուրդ - Հայաստան համագործակցություն
Կոնտակտներ
