Նոյեմբերի 9-ին Եվրոպայի խորհրդի «Ժողովրդավարական զարգացում, ապակենտրոնացում և լավ կառավարում Հայաստանում – 2-րդ փուլ» ծրագիրն անցկացրեց իր Ղեկավար կոմիտեի երկրորդ նիստը:
Եվրոպայի խորհրդի Մարդկային արժանապատվության, հավասարության և կառավարման հարցերով տնօրեն տիկին Կլաուդիա Լուչիանին հիշեցրեց Եվրոպայի խորհրդի աջակցությունը Հայաստանին՝ Ղարաբաղը լքած հայերի հրատապ կարիքները հոգալու համար, ինչպես նաև կազմակերպության ընդհանուր աջակցությունը ՏԻՄ ոլորտի նոր իրավական դաշտի ձևավորմանը՝ Եվրոպայի խորհրդի չափանիշներին համապատասխան։
ՀՀ տարածքային կառավարման և ենթակառուցվածքների նախարարի տեղակալ պարոն Վաչե Տերտերյանը շնորհակալություն հայտնեց Եվրոպայի խորհրդին Հայաստանին ցուցաբերվող աջակցության համար՝ նշելով Միգրացիայի և փախստականների հարցերով ԵԽ գլխավոր քարտուղարի հատուկ ներկայացուցչի և Մարդու իրավունքների հանձնակատարի վերջին այցերը: Նա ընդգծեց, որ վերջին բարեփոխումները տեղի են ունեցել Եվրոպայի խորհրդի աջակցությամբ, և նշեց վերջերս ընդունված Ապակենտրոնացման հայեցակարգի փաստաթուղթը։
Աջակցելով Հայաստանին հետագա ապակենտրոնացման ճանապարհին, «Ժողովրդավարական զարգացում, ապակենտրոնացում և լավ կառավարում Հայաստանում – 2-րդ փուլ» ծրագրի հաջորդ վեց ամիսների համար նախատեսված հիմնական նպատակները հետևալն են. (ա) առաջարկվող նոր օրենքի նախագծի նախապատրաստական աշխատանքների շարունակությունը, ներառյալ Աշխատաժողովի շրջանակում ֆիսկալ ապակենտրոնացման նոր դրույթները գործընկերների հետ քննարկելը, (բ) դիմակայունության ռազմավարությունների (ReBus) մշակումը առաջնագծի համայնքների համար և համապատասխան մարզերում ապաստանած Ղարաբաղի հայերի ամենաանհրաժեշտ կարիքներին արդյունավետ արձագանքմանը օժանդակելը, և (գ) տեղական մակարդակում կարողությունների զարգացումը՝ ներառյալ Անդրսահմանային համագործակցության առաջնորդության ակադեմիայի ծրագիրը։
Քաղաքացիական հասարակության կազմակերպությունների և համայնքների ներկայացուցիչները նշեցին փախստականների անմիջական խնդիրներին ոչ միայն կարճաժամկետ լուծումներ տալու, այլ նաև Ղարաբաղի հայերի մասնագիտական զարգացման և տեղական տնտեսությանը ինտեգրելու հնարավորություններ տալու մարտահրավերները:
Հանդիպումը կազմակերպվել է «Ժողովրդավարական զարգացում, ապակենտրոնացում և լավ կառավարում Հայաստանում – 2-րդ փուլ» ծրագրի համատեքստում, որն իրականացվում է Եվրոպայի խորհրդի Հայաստանի համար իրականացվող գործողությունների ծրագրի շրջանակում՝ Ավստրիայի զարգացման գործակալության ֆինանսավորմամբ: