2023 թվականի մարտի 22-ին Երևանում ավելի քան 30 ներկայացուցիչներ 18 քաղաքացիական հասարակության կազմակերպություններից (ՔՀԿ) մասնակցեցին «Կանանց նկատմամբ բռնության և ընտանեկան բռնության կանխարգելման և դրա դեմ պայքարի Եվրոպայի խորհրդի կոնվենցիայի արժեքները, նպատակները և հիմնական դրույթները ամրապնդելու նպատակով իրազեկման/շահերի պաշտպանության արշավների վարման մեթոդաբանությանը և գործիքակազմին քաղաքացիական հասարակության կազմակերպությունների համար» իրազեկվածության բարձրացման սեմինարին։
Մեթոդաբանությունը մշակվել է Եվրոպայի խորհրդի և Կանայք ընդդեմ բռնության եվրոպական ցանցի (WAVE), ՄԱԿ-կանայք կազմակերպության կողմից՝ ԵԽ կանանց նկատմամբ բռնության, ընտանեկան բռնության կանխարգելման և դրա դեմ պայքարի կոնվենցիայի վերաբերյալ իրազեկվածությունը բարձրացնելու համար:
Միջազգային ներկայացուցիչները իրենց փորձով կիսվեցին հայաստանյան ՔՀԿ-ների հետ։ WAVE ցանցի ներկայացուցիչ Անկա Չիուպան ներկայացրեց մեթոդաբանությունը։
Չեխիայի կանանց լոբբիից Քլարա Հլավաչկովան և Բուլղարիայի կանանց լոբբիի ներկայացուցիչ Իլիանա Բալաբանովան կիսվեցին իրենց փորձով, դասառությամբ և ներկայացրեցին այն մարտահրավերները, որոնց բախվել են իրենց կազմակերպությունները՝ իրազեկվածությունը բարձրացնելու նպատակով այս մեթոդաբանությունը և գործիքակազմը կիրառելիս։
«Մենք՝ քաղաքացիական հասարակության կազմակերպությունները, առանցքային դեր ունենք պետական մարմիններին աջակցելու գենդերային բռնության և ընտանեկան բռնության մասին իրազեկվածության բարձրացման, այս երևույթի նկատմամբ պետական արձագանքի բարելավման գործում,- ասաց Կանանց աջակցման կենտրոնի ծրագրերի ղեկավար Հասմիկ Գևորգյանը, - և այս մեթոդաբանությունը շատ տեղին է և մեզ շատ օգնելու է այդ հարցում»
Սեմինարից հետո Եվրոպայի խորհուրդը հայտարարում է առաջարկների մրցույթ՝ նպատակ ունենալով աջակցել հայաստանյան ՔՀԿ-ների իրազեկման և քարոզարշավների անցկացման նախաձեռնություններին ամրապնդելու Կանանց նկատմամբ բռնության և ընտանեկան բռնության կանխարգելման և դրա դեմ պայքարի Եվրոպայի խորհրդի կոնվենցիայի արժեքները, նպատակները և դրույթները, ստեղծելով դրական պատմություններ և ցրելով կոնվենցիայի վերաբերյալ առասպելներն ու ապատեղեկատվությունը:
Սեմինարը և առաջարկների մրցույթը կազմակերպվել են ԵԽ «Կանանց նկատմամբ բռնության հաղթահարումը եւ գենդերային հավասարության ամրապնդումը Հայաստանում» ծրագրի շրջանակներում: