Հայաստանի քրեական արդարադատության համակարգում վերականգնողական մոտեցման բարելավման նպատակով 2024թ. մարտի 22-ին Երևանում տեղի ունեցավ աշխատաժողով՝ նվիրված Հայաստանի քրեակատարողական հիմնարկներում (ՔԿՀ) փորձարկվող ռիսկերի և կարիքների գնահատման (ՌԿԳ) գործիքի հուսալիության ստուգմանը: Հանդիպմանը մասնակցում էին Քրեակատարողական ծառայության աշխատակիցները և գործիքի փորձարկմանը անմիջականորեն ներգրավված ՔԿՀ անձնակազմը: Աշխատաժողովի հիմնական նպատակն էր անդրադառնալ ՌԿԳ գործիքի ներդրման ընթացքում առաջացած մարտահրավերներին և գնահատել դրա հուսալիությունը:
ՌԿԳ գործիքը, որը փորձնականորեն կիրառվում է 2023 թվականի դեկտեմբերի 1-ից չորս քրեակատարողական հիմնարկներում, խոստումնալից առաջընթաց է Հայաստանի քրեակատարողական համակարգում դատապարտյալների վերասոցիալականացման ռիսկերի և կարիքների գնահատման և կառավարման գործում: Գործիքի հուսալիության ստուգումը, ինչպես նաև աշխատաժողովի ընթացքում արդյունավետ քննարկումները առաջ քաշեցին տարբեր հարցեր, ներառյալ փորձնական փուլում առաջացած գործնական մարտահրավերները: Գործիքի հուսալիությունը ստուգելու համար մասնակիցները աշխատել են նույն դեպքի վրա միմյանցից անկախ՝ գնահատելով դատապարտյալի վերասոցիալականացման կարիքները ՌԿԳ գործիքի միջոցով: Նպատակն էր տեսնել, թե արդյոք բոլոր մասնակիցները հասնում են գնահատման նմանատիպ արդյունքների՝ ի ցույց դնելով գործիքի հուսալիությունը։
Աշխատաժողովը նաև արդյունավետ երկխոսության և մտքերի փոխանակման հարթակ հանդիսացավ և մասնակիցները ակտիվորեն ներգրավվեցին ՌԿԳ գործիքի հուսալիությունն ու արդյունավետությունը բարձրացնելու ռազմավարությունների քննարկումներին: Քանի դեռ ընթանում է գործիքի փորձարկման փուլը, հուսալիության ստուգման արդյունքները և սեմինարից ստացված պատկերացումները կարևոր նշանակություն կունենան ՌԿԳ գործիքի կատարելագործման համար՝ Հայաստանի քրեակատարողական համակարգում ընդհանուր ներդրման համար:
Միջոցառումը կազմակերպվել է Եվրոպայի խորհրդի կողմից իրականացվող «Ազատությունից զրկված անձանց իրավունքների պաշտպանության ամրապնդումը» ծրագրի շրջանակներում, որն օգնում է ազգային իշխանություններին էլ ավելի խորացնել քրեակատարողական բարեփոխումները, քրեակատարողական առողջապահությունը և ազատությունից զրկված անձանց մարդու իրավունքների պաշտպանությունը: Ծրագիրը ֆինանսավորվում է Եվրոպայի խորհրդի 2023-2026 թվականների՝ Հայաստանի համար գործողությունների ծրագրի շրջանակներում և իրականացվում է Եվրոպայի խորհրդի կողմից: