Qadınlara qarşı zorakılığın və məişət zorakılığının qarşısının alınması zərərçəkmiş şəxslərin təhlükəsizliyini və onlara dəstəyi prioritet hesab edən, eyni zamanda zorakılıq törədən şəxslərin davranışlarına təsir göstərən və zorakılığın təkrarlanması riskini azaldan kompleks tədbirlər tələb edir. Əsas məsələ yalnız zərərçəkmiş şəxslərin səmərəli müdafiəsini və dəstək xidmətlərinə çıxışını təmin etmək deyil, həm də zorakılığın kökündə dayanan səbəbləri və zorakı davranış modellərini aradan qaldırmaqla gələcək zorakılıq hallarının qarşısını almaqdır. Zərərçəkmiş şəxslərə göstərilən dəstək onların təhlükəsizliyinin, bərpasının və ədalət mühakiməsinə çıxışının təmin edilməsində, eləcə də yenidən zorakılığa məruz qalmalarının və əlavə zərərin qarşısının alınmasında mühüm əhəmiyyət daşıyır. Bu baxımdan zorakılıq törədən şəxslərlə iş üzrə proqramların hazırlanması həmin şəxslərdə məsuliyyət hissini gücləndirən, zorakılığa şərait yaradan yanaşmaları dəyişməyə və davranış dəyişikliyini dəstəkləməyə yönəlmiş strukturlaşdırılmış və faktlara əsaslanan müdaxilələrin yaradılmasını nəzərdə tutur.
Zərərçəkmiş şəxslərə dəstək xidmətləri və digər aidiyyəti qurumlarla sıx əlaqələndirmə şəraitində həyata keçirilən bu proqramlar zorakılığın təkrarlanması hallarının azaldılmasına, qadınlara qarşı zorakılığa və məişət zorakılığına qarşı əlaqələndirilmiş tədbirlərin gücləndirilməsinə töhfə verir. Bu səyləri dəstəkləmək məqsədilə Azərbaycanın yeddi qurumundan 13 nümayəndə Macarıstanın Budapeşt şəhərində keçirilən “Zorakılıq törədən şəxslərlə iş üzrə Avropa standartlarına uyğun səmərəli proqramlara doğru” adlı beynəlxalq konfransda iştirak edib. Azərbaycan nümayəndə heyətinə Ailə, Qadın və Uşaq Problemləri üzrə Dövlət Komitəsi, Daxili İşlər Nazirliyi, Ədliyyə Nazirliyi, Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi, Səhiyyə Nazirliyi, Baş Prokurorluq, eləcə də Elm və Təhsil Nazirliyinin nümayəndələri daxil olub.
Konfrans Azərbaycan qurumlarına məişət zorakılığına qarşı əlaqələndirilmiş tədbirlərin tərkib hissəsi kimi zorakılıq törədən şəxslərlə iş üzrə proqramların gücləndirilməsi ilə bağlı Avropadan olan tərəfdaşlar və ekspertlərlə təcrübə mübadiləsi aparmaq imkanı yaradıb. Müzakirələrdə Avropa standartları, strukturlaşdırılmış risk qiymətləndirilməsi və risklərin idarə edilməsi, zərərçəkmiş şəxslərə dəstək xidmətləri ilə əməkdaşlıq, monitorinq və qiymətləndirmə metodologiyaları, eləcə də qurumlararası yanaşmalar diqqət mərkəzində olub. Azərbaycan nümayəndə heyəti proqramların icrası üçün nəzərdə tutulan praktiki alət və metodologiyalara, o cümlədən ENGAGE modelinə və zorakılıq törədən şəxslərlə iş üzrə proqramların keyfiyyət standartlarına xüsusi maraq göstərib.
Konfrans “Qadınlara qarşı zorakılığa son qoyulması: çoxölkəli proqram” çərçivəsində keçirilib. Azərbaycan qurumlarının nümayəndələrinin iştirakı Avropa Şurası və Avropa İttifaqının “Yaxşı İdarəçilik üçün Tərəfdaşlıq III” birgə proqramı çərçivəsində həyata keçirilən “Azərbaycanda qadınlara qarşı zorakılıq və məişət zorakılığının qarşısının alınması və onunla mübarizə” layihəsi vasitəsilə təmin edilib. Proqram Avropa Şurası və Avropa İttifaqı tərəfindən birgə maliyyələşdirilir və Avropa Şurası tərəfindən icra olunur.
